Aldurinn færist yfir okkur með ólíkum hætti. Sumir halda góðu starfsþreki og geta meðal annars nýtt sér tæknina til að láta skoðanir sínar í ljós. Það geri ég óspart á 82. aldursári samhliða því að leggja rækt við líkamlega og andlega heilsu. Með aðstoð vitvélanna verður þessi vinna sífellt auðveldari. Undarlegast er þegar fundið er að því að maður á mínum aldri segi skoðun sína í netheimum, það er oft grunnt á aldursfordómunum.

Donald Trump Bandaríkjaforseti er áttræður í dag, 14. júní. Eini maðurinn sem áður hefur gegnt embætti forseta Bandaríkjanna á níræðisaldri er Joe Biden, forveri Trumps.

Trump ætlar ekki að skera afmælistertu með barnabörnunum heldur fyllir hann garð Hvíta hússins af UFC-bardagamönnum. Þeir stunda ekki hnefaleikakeppni í hefðbundnum skilningi UFC er fyrirtæki sem sýnir blandaðar bardagalistir.

Sérstakur keppnispallur og áhorfendastúkur hafa verið reistar á lóð Hvíta hússins og viðburðurinn er sagður sá fyrsti sinnar tegundar sem haldinn hefur verið þar. Jafnframt er þetta fjölmennasta afmælisboð sem nokkur bandarískur forseti hefur haldið. Það er sagt falla fullkomlega að þeirri ímynd sem Trump hefur um árabil lagt rækt við: kraft, keppni, átök og sýnileika.

The Telegraph birti þessa samsettu mynd sem sýnir Trump dotta á fundum eða við opinberar athafnir.

Í tilefni af afmælinu birtir The Telegraph grein um hvort aldurinn sé farinn að segja til sín hjá forsetanum. Bent er á myndskeið þar sem hann virðist dotta á fundum eða við opinbera viðburði, auk þess sem andstæðingar hans halda því fram að starfsþrek hans hafi minnkað. Þá sýna skoðanakannanir að margir hafa áhyggjur af líkamlegu eða andlegu atgervi forsetans.

Starfsmenn Hvíta hússins hafna öllum þessum vangaveltum. Þar er lögð áhersla á að Trump vinni óvenju langan vinnudag, sé sífellt til taks fyrir starfsmenn sína og hafi staðist nýlega læknisskoðun með glæsibrag. Utanríkisráðherrann Marco Rubio hefur jafnvel sagt að vandinn sé fremur sá að forsetinn sofi of lítið en of mikið. Hann veki menn upp fyrir allar aldir með fyrirspurnum og fyrirmælum.

Öll þessi umræða um heilsu Trumps á bara eftir að magnast. Hún minnir á hve hratt pendúllinn sveiflast í bandarískum stjórnmálum. Fyrir fáeinum misserum beindist athyglin að aldri og heilsu Joes Biden. Eftir að allir sáu 28. júní 2024 að Biden hélt tæplega þræði í sjónvarpskappræðum við Trump voru dagar Bidens sem forsetaframbjóðanda taldir, hann var þá 81 árs. Nú hefur Trump verið settur undir þessa smásjá af fjölmiðlamönnum og öllum almenningi. Aldurinn gerir ekki upp á milli flokka.

Hvað sem því líður er ljóst að Trump hefur sýnt einstakt pólitískt úthald. Hann hefur verið ráðandi persóna í bandarískum stjórnmálum í áratug. Hann tapaði forsetakosningum, sneri aftur, vann á ný og hefur haldið ótrúlegum áhrifum á stuðningsmenn sína allan tímann. Hvað sem mönnum finnst um hann sjálfan eða stefnu hans verður þetta ekki af honum tekið.

Fáir stjórnmálamenn hafa vakið jafnsterkar tilfinningar, skipt þjóð sinni jafn skýrt í fylkingar eða haft jafn afgerandi áhrif á stjórnmál Vesturlanda og Trump. Hér talar utanríkisráðherra Íslands um hann og orð hans sem helstu ástæðu þess að stefnt er að þjóðaratkvæðagreiðslu um aðlögunarviðræður við ESB 29. ágúst 2026. Trump er sagður hafa skapað einstakt tækifæri fyrir Ísland í samningum við ESB. Fyrir þessu er alls engin vissa eins og svo mörgu öðru sem sagt er um eða vegna Trumps.

Áttræður Donald Trump stendur enn í miðju stormsins. Það eitt segir meira um hann en nokkuð annað.