Maðurinn sem hóf skothríð hjá eftirlitsstöð við Hvíta húsið í gærkvöld hét Nasire Best. Hann var 21 árs gamall og átti sér sögu um geðræn vandamál, eftir því sem fréttastofa bandarísku sjónvarpsstöðvarinnar CBS segir og BBC greinir frá.
Að sögn yfirvalda var Best felldur í skotbardaga við leyniþjónustumenn en Donald Trump Bandaríkjaforseti hefur þakkað lögreglumönnunum fyrir snögg og fagleg viðbrögð við að yfirbuga byssumanninn. Í færslu á dreifimiðli sínum Truth Social sagði Trump atvikið og skotárásina á hátíðarkvöldverði með blaðamönnum í apríl sýna hversu mikilvægt það sé fyrir alla framtíðarforseta Bandaríkjanna að fá byggt öruggasta rými sinnar tegundar í höfuðborginni. Þjóðaröryggi krefst þess. Þarna vísar Trump til fyrirhugaðs danssals í Hvíta húsinu.
Atvikið enn til rannsóknar
Atvikið er enn til rannsóknar og líklegt er að lokanir verði í gildi í kringum Hvíta húsið áfram.
Vitað er að skömmu fyrir klukkan 18 að staðartíma eða um klukkan 23 að íslenskum tíma í gær dró maður upp skammbyssu úr tösku og hóf skothríð fyrir utan Hvíta húsið á gatnamótum 17da strætis og Pennsylvaníu breiðgötunnar í Washington nærri Eisenhower byggingunni.
Leyniþjónustumenn á vakt á horninu svöruðu skothríðinni og særðu byssumanninn, sem var fluttur á sjúkrahús en þar var hann úrskurðaður látinn.
Vegfarandi særðist einnig í skotárásinni en leyniþjónustan hefur ekki gefið frekari upplýsingar um ástand hans. Engir lögreglumenn eða leyniþjónustumenn særðust.
Reyndi að komast inn í Hvíta húsið á síðasta ári
Donald Trump Bandaríkjaforseti var í Hvíta húsinu þegar árásin átti sér stað en hún hafði engin áhrif á verndarsvæði hans eða starfsemi að sögn Leyniþjónustunnar.
Heimildarmaður sem þekkir til sagði CBS að Best hefði reynt að komast inn í Hvíta húsið í júlí á síðasta ári en verið handtekinn af lögreglumönnum í nágrenninu. Í kjölfarið hafi hann verið vistaður á geðdeild.
Fréttamönnum í Hvíta húsinu var í snarhasti komið fyrir inni í blaðamannaherbergi þegar skothvellirnir heyrðust en einhverjir höfðu verið að taka upp þegar atvikið átti sér stað.
15-30 skothvellir
Myndband sem Selina Wang, yfirfréttaritari ABC í Hvíta húsinu, deildi sýndi hana leita skjóls þegar skothríð heyrðist handan Norðurflatarins. „Okkur var sagt að flýta okkur inn í blaðamannaherbergið þar sem við erum núna,“ skrifaði Wang á X.
Óljóst hvar Trump var nákvæmlega staddur
Aaron Navarro, fréttamaður CBS News, sagði við BBC að hann hefði verið á Norðurflötinni þegar hann heyrði skothvelli, sem á köflum hljómuðu eins og þeir kæmu úr mismunandi byssum, rétt fyrir utan lóðina.
„Um leið og við heyrðum það, beygðum við okkur niður og ég sá aðra fréttamenn byrja að hlaupa, og skömmu síðar heyrði maður leyniþjónustumenn segja ‚inn með ykkur, inn með ykkur,“ sagði hann.
Navarro sagði óljóst hvar nákvæmlega Trump var staddur inni í Hvíta húsinu þegar skotárásin átti sér stað og hvort hann hafi jafnvel heyrt hana.
Hrósuðu leyniþjónustunni
John Thune, leiðtogi meirihlutans í öldungadeildinni, og Mike Johnson, forseti fulltrúadeildarinnar, hrósuðu leyniþjónustunni fyrir aðgerðir þeirra og viðbrögð við skotárásinni.
Thune skrifaði á samfélagsmiðla að hann væri þakklátur fyrir viðleitni þeirra á meðan Johnson skrifaði: „Bænir okkar eru með fórnarlömbum tilgangslausrar skotárásar kvöldsins og við óskum þeim skjóts bata.“
