Akureyrarbær tilkynnti í febrúar að starfsfólk sjúkrahússins í bænum gæti óskað eftir forgangi að skólavist í leikskólum bæjarins. Var þetta gert til að bregðast við bráðum mönnunarvanda SAk og náði til bæði lækna og hjúkrunarfræðinga. Nýverið var ákveðið að forgangurinn næði einnig til starfsfólks HSN.
„Forgangurinn felur í sér að barn færist ofar á biðlista og fái boð um leikskólavist þegar pláss losnar. Skilyrði fyrir samþykktri forgangsbeiðni er að foreldri eða forráðamaður leggi fram staðfestingu á skuldbindingu um að starfa hjá viðkomandi stofnun í að minnsta kosti 12 mánuði frá upphafi leikskóladvalar,“ segir á vef Akureyrarbæjar.
Að sögn Erlu Björnsdóttur, forstjóra SAk, er mikil ánægja með þetta framtak hjá bænum og hafa þegar tveir starfsmenn nýtt sér forganginn. Þetta verði til þess að auðveldara verði að laða að sér sérhæft starfsfólk þegar fram líða stundir.
Ásthildur Sturludóttir, bæjarstjóri á Akureyri, sagði í samtali við fréttastofu að staða leikskólamála á Akureyri væri með ágætum og engir biðlistar væru eins og er. Allir sem sóttu um fyrir 1. mars yrðu innritaðir í haust.
Forgangurinn sem starfsfólk SAk og HSN nýtur er kominn til að vera og mun vonandi aðstoða bráðan mönnunarvanda sem hefur verið viðloðandi heilbrigðisstofnanir á Akureyri:
Þetta er bara okkar leið til þess að leggja hönd á plóg og hjálpa til við mönnun á heilbrigðisstofnunum.
