Bandaríski herinn gerði árásir á skotmörk í suður Íran í gærkvöld. Einnig voru gerðar árásir á tvö skip sem voru að koma fyrir tundurduflum, samkvæmt talsmanni aðgerðarstjórnar Bandaríkjahers. Hann sagði að árásirnar hefðu verið gerðar í sjálfsvörn til að verja bandaríska hermenn gegn ógnum frá írönskum hermönnum en gaf ekki upp nánari upplýsingar.
Samkvæmt IRIB heyrðust margar sprengingar við hafnarborgina Bandar Abbas nærri Hormússundi. Borgin er mikilvæg hafnarborg og íranski sjóherinn er einnig með herstöð þar. Ekki hafa borist fréttir af mannfalli í þessum árásum.
Írönsk stjórnvöld hafa ekki brugðist við árásunum og það er óljóst hvort þær hafi áhrif á viðkvæmt vopnahlé sem hófst 8. apríl.
Marco Rubio utanríkisráðherra Bandaríkjanna, sem staddur er í opinberri heimsókn á Indlandi, sagði við fjölmiðla að samningur væri enn mögulegur en viðbúið væri að viðræður tækju nokkra daga. Hann sagði að það yrði að opna Hormússund að nýju með einum eða öðrum hætti. Staðan væri ólögleg, óviðunandi og óásættanleg fyrir heiminn.
Leggur til að auðgað úran verði afhent Bandaríkjamönnum eða eytt undir eftirliti í Íran
Donald Trump Bandaríkjaforseti leggur til að auðgað úran Írana verði annaðhvort afhent Bandaríkjamönnum eða því verði eytt. Þetta skrifaði hann í færslu á samskiptamiðlinum Truth Social í kvöld.
Hann leggur til að ef auðguðu úrani verður eytt, þá verði það gert í samvinnu við stjórnvöld í Íran og eyðilagt á staðnum eða öðrum viðeigandi stað, undir eftirliti Kjarnorkumálaráðs Bandaríkjanna eða sambærilegra eftirlitsstofnana.
Írönsk stjórnvöld hafa sagt að viðræðum um kjarnorkuáætlun landsins hafi verið frestað þar til friðarsamkomulag er frágengið. Íranar hafa einnig sett það fram sem skilyrði að friðarsamkomulagið nái einnig yfir vopnahlé í Líbanon.
Benjamin Netanyahu forsætisráðherra Ísraels sagði í myndskeiði á samfélagsmiðlum í gær að Ísraelar ætli sér að gera enn fleiri þungar árásir á Hezbollah í Líbanon.
