Vonir glæddust í dag um friðarsamkomulag á milli Bandaríkjanna og Íran. Ríkisfjölmiðlar í Íran fullyrtu að þeir hefðu komist yfir samningsdrög á milli landanna.
Meðal þess sem samningurinn átti að fela í sér var að yfirvöld í Íran opnuðu fyrir skipaumferð um Hormússund á ný og í staðinn yrði herlið Bandaríkjanna dregið frá svæðinu ásamt því að hafnbanni yrði aflétt.
Olíuverð féll um nærri fimm prósent á mörkuðum í dag eftir að fréttir af samningnum birtust. Stjórnvöld í Washington voru fljót að segja samninginn uppspuna frá rótum og sendu frá sér yfirlýsingu á samfélagsmiðlum þar sem sagt var að ekki væri hægt að treysta neinu sem fram kæmi í írönskum fjölmiðlum.
Stjórnvöld í Íran fullyrtu í dag að ósennilegt væri að allsherjarátök myndu brjótast út að nýju.
Friðarviðræður á milli Bandaríkjanna og Íran standa enn yfir. Marco Rubio, utanríkisráðherra Bandaríkjanna, sagði í gær að enn væri möguleiki á samningi en lýsti því yfir að Hormússund yrði opnað hvort sem friður kæmist á eða ekki.
Donald Trump forseti Bandaríkjanna taldi samningsstöðu Írans komna í þrot þar sem sjó- og flugher landsins hefði verið nær útrýmt. Samkvæmt úttekt leyniþjónustu Bandaríkjanna, sem var til umfjöllunar hjá New York Times, hefur Íran þó enn aðgang að mörgum eldflaugasvæðum meðfram Hormússundi. Sú úttekt bendir til þess að her landsins sé sterkari en Trump hafi fullyrt.
Íran sakaði í gær Bandaríkin um að brjóta gegn vopnahléi sem enn stendur á milli þjóðanna. Bandaríski herinn sagði að ráðist hefði verið í varnarskyni gegn írönskum flugskeytastöðvum og bátum sem komu fyrir tundurduflum bæði á mánudag og þriðjudag.
