Einmanaleiki hefur aukist undanfarna áratugi. Hann hefur áhrif á fólk á öllum aldri og alls staðar í samfélaginu.
Vika einmanaleikans er nú haldin í annað sinn á vegum Kvenfélagasambands Íslands.
Henni er ætlað að vekja til umhugsunar og hvetja til aukinnar samkenndar og mannlegra samskipta.
Um tuttugu þúsund símtöl berast árlega í Hjálparsímann 1717. Fjórðungur þeirra er frá fólki sem er félagslega einangrað.
Mikilvægt fyrir fólk að eiga einhver mannleg samskipti
Sandra Björk Birgisdóttir, verkefnastjóri Hjálparsíma Rauða krossins, 1717, segir að margir hafi samband daglega.
„Þegar að fólk býr við mikla félagslega einangrun, það þarf að eiga bara þessi félagslegu, mannlegu samskipti sem eru okkur öllum mikilvæg. Þá hefur það samband við okkur.“
Sandra segir fólk hafa samband oft bara til að spjalla um þær bækur sem það er að lesa þann daginn eða hvað er á dagskrá sjónvarpsins.
Samkvæmt rannsóknum eru að jafnaði 36% þjóðarinnar oft, stundum eða alltaf einmana.
Hjálparsíminn veitir andlegan stuðning þeim sem þurfa á að halda.
Bað prestinn að koma skilaboðum áleiðis
Kona, sem býr við mikla félagslega einangrun, hefur hringt reglulega í Hjálparsímann í mörg ár. Hún á engan að en er í samskiptum við heimaþjónustu, lækna og prestinn í hverfinu sínu
„Hún talaði við prestinn sinn um að hann þyrfti að láta okkur vita þegar hennar dagur væri kominn og hún væri farin að við þyrftum að koma í jarðarförina hennar. Því við værum í rauninni fjölskyldan hennar.“
Sandra segir sögu konunnar sýna hversu einmana fólk getur verið og hversu miklu máli það getur skipt fólk að geta haft samband við Hjálparsímann þegar hentar.
Að mati Söndru hefur einmanaleiki og félagsleg einangrun aukist í samfélaginu á sama tíma og vitund fólks á þeim úrræðum sem standa þeim til boða hefur aukist.
