Hið minnsta 1,8 af um tveimur milljónum íbúa Gaza bíður erfiður vetur án fullnægjandi húsaskjóls þegar fjórði vetur harkalegra aðgerða og takmarkana Ísraelsríkis gengur í garð.
Alþjóðafólksflutningastofnunin kallar eftir auknum fjárstuðningi við mannúðaraðstoð á Gaza og hvetur Ísraelsstjórn til að slaka á takmörkunum við aðflutning gagna. Þar á meðal er efni til byggingar hátt í níu þúsund neyðarskýla, sem dugi þó skammt.
Alþjóðaheilbrigðisstofnunin gagnrýndi nýverið síendurteknar tafir á afhendingu neyðarbirgða og lækningavara. Staða heilbrigðismála væri verulega slæm enda ekkert sjúkrahús á Gaza fullstarfhæft. Regntímabilið geti einnig leitt af sér aukna útbreiðslu sjúkdóma.
Ísraelsk stjórnvöld segjast með takmörkunum vilja koma í veg fyrir að til Hamas berist hlutir sem unnt sé að beita í hernaðarlegum tilgangi. Viðkvæmt vopnahlé hefur staðið í tæpt ár og hjálparstofnanir segja ástandið slæmt, tjöld og bráðabirgðaskýli séu í slæmu ástandi og fjöldi fólks hafist við í rústum húsa.
Á annan tug, þar af tólf börn, fórst þegar hús þeirra hrundi í síðasta mánuði. Framkvæmdastjórinn Amy Pope segir efni til byggingar skýla þurfa að berast tafarlaust og í réttu umfangi. Óttast er að vegna El Niño-veðurfyrirbærisins rigni meira og ákafar á komandi vetri en á meðalári sem auki enn á hættuna á hrynjandi húsa og mannskæðum flóðum.
