Kjötmjöli verður dreift á um þúsund hektara lands í sumar til að græða upp auðnir. Sérfræðingar hjá ríkisstofnuninni Landi og skógi segja áburðinn hafa gefið góða raun sunnanlands og nú er í fyrsta sinn dreift í stórum stíl norðan heiða.
Þorlákur Páll Jónsson, vélamaður hjá Landi og skógi, er búinn að fara hring eftir hring og fram og til baka á dráttarvélinni í sumar, eins og sést á mynstrinu sem hann hefur skilið eftir sig á Hólasandi, sandflæminu milli Mývatns og Húsavíkur.
Í dreifaranum er kjötmjöl, fíngerður lífrænn áburður sem er unninn úr afskurði úr sláturhúsum. Verkefni Þorláks þetta sumarið er að skilja eftir um hundrað tonn af áburði.
Á Hólasandi eru eins konar eyjar af melgresi, lúpínu og birki, ummerki um landgræðsluverkefni fyrri ára. Það hafa nefnilega verið gerðar margar atlögur að því í gegnum árin að rækta upp þessa auðn.
Og markmiðið er að eyjarnar stækki, plönturnar sái sér víðar og loks verði til gróðurþekja.
Kjötmjölið hefur virkað vel á öðrum uppblásturssvæðum sunnan til þar sem veður og vindar vinna oft gegn landgræðslu. Það hafi örvað vöxt plantna eins og birkis og verði vonandi til þess að þær verði kraftmeiri, dreifi meira af fræjum og fari þá að rækta upp auðnina án allrar aðkomu manna.
