Sigmundur Davíð Gunnlaugsson, formaður Miðflokksins, dregur fram opinbert skjal Evrópusambandsins frá árinu 2010 þar sem forsendur aðildarviðræðna við Ísland eru lagðar fram og segir kjósendur ekki þurfa að hefja viðræðurnar á ný til þess að komast að því hvað felist í ferlinu.
„Gjörið þið svo vel, hér er innihald pakkans, útlistað, yfirfarið og stimplað af Evrópusambandinu,“ skrifar Sigmundur og birtir hlekk á samningsramma ESB fyrir aðildarviðræðurnar við Ísland.
Framgangur viðræðnanna á samkvæmt rammanum að ráðast af því hvernig Íslandi gengur að uppfylla skilyrði aðildar og undirbúa sig fyrir inngöngu í sambandið.
Sameiginlegt markmið viðræðnanna er aðild
Í skjalinu, sem Evrópusambandið samþykkti áður en formlegar aðildarviðræður við Ísland hófust árið 2010, eru grundvallarforsendur viðræðnanna settar fram.
Þar segir meðal annars að „sameiginlegt markmið viðræðnanna sé aðild“. Jafnframt er tekið sérstaklega fram að viðræðurnar séu opið ferli og að niðurstaða þeirra sé ekki tryggð fyrirfram.
Framgangur viðræðnanna á samkvæmt rammanum að ráðast af því hvernig Íslandi gengur að uppfylla skilyrði aðildar og undirbúa sig fyrir inngöngu í sambandið.
Landskjörstjórn lýsir þessu með sambærilegum hætti á upplýsingavef vegna þjóðaratkvæðagreiðslunnar. Þar segir að markmið aðildarviðræðna sé að gera aðildarsamning, en að það feli ekki í sér endanlega ákvörðun um inngöngu Íslands í ESB.
Þarf að taka upp regluverk ESB
Í samningsrammanum kemur einnig fram að aðild feli í sér að Ísland samþykki þau réttindi og skyldur sem fylgja kerfi Evrópusambandsins, svokallað acquis eða regluverk sambandsins.
Ísland þurfi að beita regluverkinu eins og það stendur þegar til aðildar kemur og tryggja framkvæmd þess. Fram kemur að sérstakar aðlaganir geti verið gerðar og að tímabundnar undanþágur geti komið til greina í einstökum tilvikum. Slíkar tímabundnar ráðstafanir eigi hins vegar að vera takmarkaðar bæði að umfangi og tíma.
Einnig kemur fram að Ísland þurfi fram að mögulegri aðild að færa stefnu sína gagnvart ríkjum utan ESB og afstöðu sína innan alþjóðastofnana í auknum mæli til samræmis við stefnu sambandsins og aðildarríkja þess.
Ekki fullgerður aðildarsamningur
Skjalið sem Sigmundur vísar til er þó ekki fullgerður aðildarsamningur eða endanlegt tilboð ESB til Íslands. Það er ramminn sem sambandið setti um hvernig aðildarviðræðurnar skyldu fara fram og hvaða grundvallarforsendur skyldu gilda um þær.
Í sjálfum viðræðunum er farið yfir einstaka málaflokka og þar geta meðal annars komið til sérstakar aðlaganir og tímabundnar lausnir. Endanleg niðurstaða slíkra viðræðna liggur því ekki fyrir í skjalinu frá 2010.
Það breytir hins vegar ekki því sem Sigmundur vekur athygli á, að ESB skilgreindi þegar við upphaf fyrri viðræðna hvert markmið ferlisins væri og hvaða grundvallarskilyrði giltu.
„Af umræðu síðustu vikna að dæma virðast margir forvitnir að kíkja í pakkann og sjá hvað er í boði,“ skrifar Sigmundur.
