Óvíst er hvort aðalmeðferð í svokölluðu Reykholtsmáli heldur áfram á miðvikudag eða fimmtudag. Sjötta degi aðalmeðferðar lauk í dag þar sem læknar og starfsmenn lögreglu gáfu skýrslur.
Sex Íslendingar, fimm karlar og ein kona, eru ákærð fyrir að halda manni föngnum á heimili sínu í Reykholti í Bláskógabyggð og beita hann harkalegu ofbeldi til þess að hafa af honum fé í apríl 2024.
Vonast var til að skýrslutökum lyki í dag. Fjórar skýrslur eru þó eftir sem taka á af þremur maltneskum læknum og íslenskum sálfræðingi. Að því loknu fer málflutningur fram.
Erfiðlega gekk að heyra í maltneska lögreglumanninum
Lögreglumaður frá Möltu gaf skýrslu um aðkomu sína að málinu. Hann sagði að hann hefði fengið tilkynningu um klukkan þrjú um nóttina að maður hefði verið vistaður á sjúkrahúsi vegna líkamsárásar.
Lögreglumaðurinn sagði að brotaþoli hefði átt erfitt með að tjá sig. Hann hefði þó sagt að leigusali hans, dóttir hans og tengdasonur hefðu ráðist á sig ásamt tveimur öðrum. Þau hefðu svo frelsissvipt sig í þrjá daga.
Erfiðlega gekk að heyra það sem maltneski lögreglumaðurinn sagði en ekki reyndist nauðsynlegt að endurtaka skýrslutöku yfir honum.
Alls gáfu um sjö lögreglumenn á Íslandi skýrslur um aðkomu sína að málinu í dag. Fjallað hefur verið um aðrar skýrslur sem lögregla gaf í dag í færslunni hér fyrir neðan.
Til stóð að skýrsla yrði tekin af læknum á Möltu en túlki við réttarhöldin reyndist erfitt að þýða skýrslutöku af einum þeirra og þarf að endurtaka hana síðar. Til stóð að tveir aðrir læknar frá Möltu gæfu skýrslu í dag en því hefur verið frestað þangað til annar túlkur finnst.
Fyrsta viðkoma málsins hjá lögreglunni á Íslandi
Lögreglumaðurinn sem tók fyrst við málinu hér á landi gaf skýrslu fyrir dómi í dag. Hann segir að tilkynning hafi borist til sín á þriðjudegi frá varðstjóra um að manns sé saknað. Hann hafi ekki komið til vinnu og hefði boðað sig veikan á mánudag. Þá hafi dóttir hans ekki heldur heyrt frá honum í nokkra daga sem hún taldi mjög óeðlilegt.
Hugsanlegt var talið að maðurinn hefði flúið af landi brott vegna ótta við leigusala sem taldi að hann skuldaði sér peninga vegna vangoldinnar leigu.
Þá hefði vinnuveitandi lýst því að bíll brotaþola væri horfinn og að íbúð hans væri læst, sem væri mjög óvanalegt.
Vinnuveitandi hafði samband við lögreglu aftur um kvöldið og tilkynnti þá að maðurinn hefði fundist á Möltu og að gengið hefði verið í skrokk á honum.
Rannsókn hefði þó beðið þar til lögregla hefði frekari gögn. Undir lok vikunnar hafi svo nánari upplýsingar borist og því hafi verið hægt að framkvæmda handtökur.
Andri Már Mortensen Birgisson og Ingunn Rut Sigurðardóttir voru þá handtekin á heimili sínu í Kópavogi og húsleit framkvæmd.
Reynt var að hafa uppi á föður Ingunnar og reyndist hann í Reykjavík. Lögreglumaðurinn sagði hann hafa samþykkt að ræða við lögreglu en þegar lögregla kom var hann farinn. Hann sagðist þá hafa verið á leið til lögmanns síns. Síðar meir var bróðir Andra handtekinn. Hann er einnig ákærður í málinu.
Andri Már hafi verið rólegur þegar hann var handtekinn
Annar lögreglumaður sem var viðstaddur húsleit hjá Andra Má og Ingunni gaf einnig skýrslu. Þau voru bæði handtekin áður en húsleitin fór fram. Verjendur Andra og Ingunnar hældu lögreglu fyrir handtökuna sem þeir sögðu hafa farið vel fram en þeir höfðu upplýsingar um málið úr búkmyndavélum lögreglu.
Lögreglumaðurinn sagði að Andri Már hefði verið mjög rólegur þegar hann var handtekinn „Ég segi að við verðum að leita og hann sýnir því skilning,“ sagði hann.
Við húsleitina fundust fíkniefni og sagði annar lögreglumaður í skýrslu að þar hefði fundist amfetamín, hlaup með kannabisefnum og marijúana. Einn sakborningur hefur játað að hafa átt hlaupið en ekki önnur fíkniefni sem fundust. Einnig fannst þar afsöguð haglabyssa, kylfur, hnúajárn og bíllyklar sem gengu að bíl í bílageymslunni.
Mikið hefur verið rætt um upptökur í málinu enda fordæmalaust að klukkustunda langar upptökur séu til af meintum glæpum sakborninga líkt og í þessu máli. Lögreglumaðurinn sem fann upptökurnar gaf skýrslu í dag. Hann sagði að skráning um app væri í síma Andra og að upptökurnar hefðu verið vistaðar í síma hans sem hljóðskrár.
Hann hefði einnig reynt að staðsetja símtæki brotaþola en einungis tekist að fá staðsetningu á einum síma í eitt skipti. Sá sími hafi verið í eigu bróður Andra og reyndist hann staðsettur í Reykholti.
