Það er nóg að gera hjá kornbændum þessa dagana, eins og á bænum Hvammi í Ölfusi, en þar er korn ræktað á um 24 hekturum og er nánast búið að slá og þreskja alla akrana og koma korninu í völsun fyrir veturinn og í góða geymslu áður en kýrnar á bænum fá það með í fóðrinu sínu. Um 70 mjólkurkýr eru í Hvammi.
„Já, þetta er alveg stórglæsilegt, við erum mjög ánægð með kornið. Það besta við það er að við erum að afla okkur eigin fóðurs, það er náttúrulega alveg stórkostlegt, svo fáum við smá bónus með hálminn fyrir kálfana,” segir Charlotte Clausen bóndi í Hvammi.
Splunkuný þreskivél, sem er í eigu Flókorns, sem er í eigu nokkurra kornbænda í Flóanum, sér um þreskingu á kornökrunum í Hvammi.
„Ég held að það sé metár hjá okkur í ár í korninu. Ég þakka það góða veðrið og góðri ræktun svo erum við náttúrulega svo frjósamir hér í Ölfusinu,” segir Davíð Clausen Pétursson hlæjandi en hann er verðandi bóndi í Hvammi.
En hvernig vinna bændurnir kornið?
„Við byrjum á að þreskja með þreskivél. Svo ferjum við það heim með sturtuvögnum og völsum það, setjum 99 prósent prótínsýru ofan í, þannig að lokavaran er eitthvað sem geymist allan veturinn í bömbunni, sem við sjáum hérna á bak við okkur og fer ofboðslega vel í kýrnar,” segir Davíð.
Af þessum 24 hekturum sem ræktaðir eru fást um 200 tonn af korni, sem þykir mjög gott.
Samkvæmt upplýsingum frá Ráðgjafamiðstöð landbúnaðarins er korn ræktað á um fjögur þúsund hekturum á Íslandi eins og staðan er í dag en reiknað er með að hún eigi bara eftir að aukast á næstu árum.
Þá er einnig unnið að kynbótum á korni til að auka öryggi ræktunarinnar og til að auka innlenda framleiðslu á korni, meðal annars til manneldis.
