Halla Gunnarsdóttir formaður VR vísar ásökunum Sólveigar Önnu Jónsdóttur formanns Eflingar um að kjaraviðræður VR við Samtök atvinnulífsins hafi verið „leikrit“ til föðurhúsanna.
Hún segir að þótt drög að yfirlýsingu stjórnvalda hafi legið fyrir um nokkurt skeið hafi útfærsla vaxtabótaauka ekki verið ljós. Þetta kom fram í Kastljósi í kvöld.
VR, Landssamband íslenskra verzlunarmanna (LÍV) og fagfélögin náðu samkomulagi við Samtök atvinnulífsins klukkan 15:59 í dag, einni mínútu áður en frestur til að segja upp kjarasamningunum rann út.
Sólveig Anna sagði við fréttastofu RÚV fyrr í kvöld að aðgerðir stjórnvalda hefðu þegar legið fyrir á þriðjudagskvöld og að ekkert nýtt hefði komið fram í samkomulagi dagsins. Hún taldi leikrit hafa verið sett á svið til að koma formanni VR úr þeirri klípu sem hún hefði komið sér í.
„Við vorum bara í okkar samtali“
Í Kastljósi kvöldsins var Halla spurð út í ásakanir Sólveigar Önnu.
„Ég held að ég vísi einhverjum svona ásökunum um leikrit bara til föðurhúsanna. Þetta eru bara tveir hópar sem sömdu ekki saman í síðustu samningum, eru með ólíkt hagsmunamat, að einhverju leyti ólíka hópa og eru svona bara að takast á við málin út frá ólíkum forsendum,“ sagði Halla.
Sólveig Anna sagðist hafa undir höndum tölvupóst sem sendur hefði verið klukkan 21:09 á þriðjudagskvöld og Halla hefði verið meðal viðtakenda. Þar hefðu komið fram upplýsingar um fyrirhugaðar aðgerðir stjórnvalda.
Þá var hún spurð hvort ekki hefði verið hægt að ná samkomulagi fyrr. „Nei, það lá ekki fyrir. Við vissum ekki hverjar útfærslurnar yrðu,“ svaraði Halla.
Hún sagði drög að yfirlýsingu stjórnvalda hafa legið fyrir lengi en að vaxtabótaaukanum hefði verið bætt við í samtölum við forsætisráðherra. VR hefði þurft tryggingar fyrir því að útfærslurnar myndu gagnast félagsmönnum, ekki síst ungu barnafólki sem glími við háa vexti og húsnæðiskostnað.
Hún sagði einnig að þótt önnur stéttarfélög hefðu þegar náð samkomulagi við atvinnurekendur hefði það ekki bundið VR.
„Við vorum bara í okkar samtali. Ég var að horfa inn í mitt félag og fagfélögin í sín félög,“ og bætti við að nú hefðu allir náð niðurstöðu og engin ástæða væri til að vera í metingi um það.
Hefur áhyggjur af stöðu fyrirtækja
Bjarni Benediktsson, framkvæmdastjóri Samtaka atvinnulífsins, sagði muninn á samkomulaginu við VR og Breiðfylkinguna fyrst og fremst vera áferðarmun. Hann taldi ekki að ólíkar niðurstöður samningaviðræðnanna þyrftu að valda óþarfa spennu milli fólks.
Bjarni sagðist hafa ágæta von um að hægt yrði að ná niður innlendri verðbólgu en varaði við því að sú þróun gæti reynst fyrirtækjum erfið. Hann hefði áfram áhyggjur af stöðu margra fyrirtækja sem ættu erfitt með að standa undir fyrirhuguðum launahækkunum um áramótin.
„Við sjáum uppsagnir víða í ákveðnum geirum. Við erum sums staðar, virðist vera, að tapa samkeppnishæfni. Við sjáum hugbúnaðarfyrirtæki vera að leggja niður starfsemi á Íslandi,“ sagði Bjarni.
Hann sagði áfram blikur á lofti og lagði áherslu á að Ísland væri útflutningsþjóð sem byggði afkomu sína á alþjóðlegri samkeppni.
„Ef aðstæður þrengja að útflutningsgreinunum okkar þá erum við að tapa samkeppnishæfni og við það munu störf tapast og það mun draga úr getu okkar til að greiða góð laun,“ sagði Bjarni.
