Þorgerður Katrín Gunnarsdóttir utanríkisráðherra segir það skýrt af hálfu forystu ríkisstjórnarinnar að það sé skilyrði að Ísland nái skýrri niðurstöðu varðandi bæði sjávarútveg og landbúnað ef til aðildarviðræðna við Evrópusambandið kemur.
Hún segist meðal annars vera vongóð um að samningar geti náðst sem standi vörð um hagsmuni Íslands í sjávarútvegi.
„Það eru breyttir tímar. Heimsmyndin er breytt og Evrópusambandið er gjörbreytt frá því fyrir fimmtán árum þegar Ísland lagði af stað í þennan leiðangur. Þetta eru raunverulegar samningaviðræður og það verður tekið tillit til sérstöðu Íslands, ekki síst á sviði sjávarútvegs- og landbúnaðar sem er eitthvað sem við höfum lagt sérstaka áherslu á,“ segir Þorgerður sem var gestur í Kastljósi í kvöld.
„Munurinn núna og síðast er að Bretland er farið út. Staða okkar er fyrir vikið mun sterkari og skilningsmeiri af hálfu Evrópusambandsins þegar kemur að sjávarútvegi. Það er engin lögsaga að öðrum ESB-ríkjum og reglur ESB styrkja í rauninni þá kröfu okkar að það séu engir aðrir bátar en íslenskir sem verða hér í íslenskri lögsögu.“
„Þetta eru allt okkar ítrustu kröfur“
Spurð hvort yfirráð feli í sér að íslensk stjórnvöld myndu ákvarða aflaheimildir, úthlutun þeirra og að takmarkanir á erlendu eignarhaldi yrðu áfram í gildi segir Þorgerður svo vera.
„Þetta eru allt okkar ítrustu kröfur, fullt forræði og yfirráð yfir okkar fiskveiðistjórnunarkerfi og okkar lögsögu,“ segir Þorgerður.
„Við getum mætt sterk til leiks. Við getum eytt óvissunni með því að segja já í þjóðaratkvæðagreiðslunni og fá svör við öllum þessum spurningum.
Ég er mjög bjartsýn í ljósi samskipta minna bæði við mína kollega og framkvæmdastjórnina og við eigum að láta þetta reyna.“
Mikilvægt að ræða erfiðustu kaflana fyrst
Að mati Þorgerðar er brýnt að samningaviðræðurnar byrji á erfiðustu köflunum, sem snúa að landbúnaði og sjávarútvegi.
„Síðast þegar það var farið af stað í þennan leiðangur, þrjátíu og þrír kaflar, voru opnaðir tuttugu og sjö – erfiðu kaflarnir voru geymdir. Við eigum að byrja á þessu. Við eigum að fá strax á hreint hversu langt Evrópusambandið er tilbúið að ganga.“
Þorgerður segist ekki ætla að skrifa undir samning sem tryggi Íslandi ekki fullt forræði yfir fiskveiðistjórninni.
„Þess vegna finnst mér mjög áhugavert að byrja á þessum köflum og þetta er eitthvað sem ég myndi vilja ræða sérstaklega við utanríkismálanefnd um. Það er mjög mikið undir, ekki síst fyrir íslensk heimili og lítil fyrirtæki landsins.“
