Adetayo Adebimpe hafði aldrei farið af meginlandi Afríku þegar hann flaug norður á bóginn til eyjunnar við heimskautsbaug. Loftslagið þótti honum heldur í kaldara lagi en hér gat hann stundað meistaranám. Adetayo, kallaður Tayo, kláraði námið í fyrra og gerði sér lítið fyrir og vann gervigreindarkeppni fyrr á árinu. Í kjölfarið var honum boðin vinna hjá Íslandsbanka sem gervigreindarsérfræðingur. Tayo hefur unnið við að finna veikleika í tölvukerfum íslenskra fyrirtækja og hefur fundið fjölmarga alvarlega veikleika, þar á meðal í bönkum.
Kenndi mér að forrita
Tayo er fæddur og uppalinn í Lagos í Nígeríu og segir hann mjög gott að búa þar. Hann flutti til Íslands fyrir þremur árum til þess að fara í meistaranám í tölvunarfræði í Háskóla Íslands og útskrifaðist þaðan síðasta vor. BS-námið tók hann í nágrannaríkinu Benín.
„Ég stefndi alltaf að því, frá því ég var krakki, að fara í tölvunarfræði en strax sem barn var ég forvitinn um það hvað væri inni í tækjum. Ég hafði alltaf áhuga á vísindum og því hvernig hlutir virka,“ segir hann en hann kenndi sjálfum sér snemma að forrita.
„Ég fékk að nota fartölvu mömmu minnar.“
Þegar þú varst að íhuga meistaranám, hvers vegna varð Ísland fyrir valinu?
„Það voru margir möguleikar og mér datt í hug Bandaríkin og Bretland en á þessum tíma, fyrir fjórum árum síðan, hafði ég aldrei heyrt talað um Ísland. Ég var að skrolla á TikTok þegar ég sá einhvern tala um að Ísland væri góður staður. Ég fór að skoða málið og sá fljótt að námið var ekki dýrt hér. Því ekki að koma hingað og fá hér menntun?“ segir Tayo.
„Ég sótti um og komst inn í meistaranámið og kom hingað haustið 2023. Hér er námið krefjandi og erfitt en mér tókst að klára.“
Mér fannst kalt
Hver voru viðbrögð þín fyrst þegar þú komst hingað?
„Mér leið mjög vel. Ísland er fyrsta vestræna landið sem ég hef komið til; ég hafði aðeins ferðast áður innan Afríku. Þegar ég kom hingað varð ég heillaður og fannst landslagið fallegt. Það var allt gott, nema veðrið. Mér fannst kalt. Þetta er allt annað en í Nígeríu þar sem hitastigið er um þrjátíu gráður,“ segir Tayo en hér býr hann á stúdentagörðum og verður þar áfram þar sem hann hyggst nú fara í nám í íslensku fyrir útlendinga.
„Ég hafði verið að vinna með skóla í Nígeríu og hafði sparað pening sem ég gat notað hér til að sjá mér farborða. Ég hafði hugsað mér að flytja aftur heim en í janúar vann ég keppni sem Íslandsbanki stóð fyrir og í kjölfarið var mér boðin vinna í bankanum sem gervigreindarsérfræðingur. Mig langar því að búa hér áfram og get það vegna þess að mér var boðin vinna.“
Spurður um keppnina, segir Tayo:
„Þetta var keppni í gervigreind og við áttum að byggja módel. Við áttum að búa til eitt sem sneri að því að íslenskan skildi tölvumál. Í grunninn áttum við að búa til gervigreindarmódel sem leysa vandamál,“ segir Tayo en hann hlaut fyrstu verðlaun í háskólaflokki í Gervigreindarkeppni Íslands, ásamt félaga sínum, Moses Osabutey, en liðið þeirra heitir CyboTRIX. Íslandsbanki styrkir keppnina.
Fann alvarlega veikleika
Tayo hafði mikla reynslu frá heimalandinu sem kom sér vel í keppninni.
„Ég hafði unnið í gervigreind og netöryggismálum í fimm ár í Nígeríu og hafði því góðan grunn í því. Ég gat notað þá þekkingu í þessari keppni. Í Nígeríu vann ég á spítölum í tölvudeild og leitaði einnig að veikleikum í tölvukerfum annarra fyrirtækja. Ef ég fann veikleika, sem hægt var að laga, fékk ég greitt fyrir það,“ segir Tayo sem vann þá sem heiðarlegur hakkari, eins og það er kallað.
„Ég hef verið í því í dágóðan tíma og hef líka unnið fyrir Defend Iceland og fengið þar villuleitarlaun. Leitað er til fyrirtækja og þau, sem hafa áhuga, eru sett á okkar lista. Ég vel svo eitthvert fyrirtæki og fer að leita að veikleikum.“
Hefurðu fundið marga veikleika í íslenskum fyrirtækjum?
„Já, ég hef fundið marga veikleika en ég má ekki gefa upp hjá hvaða fyrirtækjum. En ég get sagt að ég hef fundið veikleika bæði hjá bönkum og flugvöllum. Í fjórum tilfellum fann ég mjög alvarlega veikleika hjá bönkum þar sem hefði verið hægt að komast yfir fjárhagsupplýsingar fólks, stela þeim og selja svo á svörtum markaði. Ég tilkynnti þetta og það var lagað,“ segir hann.
„Ég byrja í Íslandsbanka átjánda maí og er mjög spenntur.“
Ítarlegt viðtal við Tayo má finna í Sunnudagsblaði Morgunblaðsins 17. maí.
