Hvert einasta sæti var skipað og rúmlega það á flokksstjórnarfundi Samfylkingarinnar í dag. Ræða formannsins og forsætisráðherrans bar heitið Styrk hönd á stýri.
„Á ólgutímum í alþjóðamálum og í öldugangi í efnahagslífi þjóðar þá er það Samfylking sem passar upp á Ísland ásamt staðföstum samstarfsflokkum okkar í ríkisstjórn. Þessu getur fólkið í landinu treyst,“ sagði Kristrún meðal annars í ávarpinu.
Kristrún segir að í dag hafi verið farið yfir stöðuna nú þegar kjörtímabilið sé hálfnað og þau mál sem Samfylkingin hafi haldið á lofti fyrir kosningar og einnig liðna viku þegar ljóst varð að kjarasamningar myndu halda, að ógleymdum efnahagsmálum:
„Ég held að við séum að horfa á vendipunkt í verðbólgu þessa dagana.“
Fyrir utan hallalaus fjárlög – hvað verður brekka að klífa þennan veturinn?
„Ég fer nú bara full tilhlökkunar inn í þennan vetur, verð ég að segja. Við erum með mörg góð mál, m.a. sem komu út úr þessari kjaralotu, ef svo má segja.
Þetta er nú bara mál sem svona verkalýðssinnaður flokkur eins og Samfylkingin hefur lagt ríka áherslu á, eins og févíti, leigubremsu og uppbyggingu íbúðakerfisins.
Þetta eru stór verkefni sem við þurfum að klára í vor til þess í raun að standa við okkar aðgerðir í þessum kjarasamningum en þetta er líka stefna Samfylkingarinnar þannig að við hlökkum til að takast á við þessi mál.“
Það er annað að vera á flokksstjórnar- eða landsfundum þegar þið eruð í brúnni og getið látið verkin tala?
„Það er bara mikil gleði hér í dag en við erum breiðfylking, við erum stór flokkur og hér kemur fólk líka til þess að ræða saman, stundum að takast á og gagnrýna.
Við fáum líka mikilvægt aðhald frá flokknum okkar hér. Þannig að þó að vel gangi þá höldum við jafnharðan áfram og tökum með okkur í baráttuna líka athugasemdir héðan.“
Varaformanninum Guðmundi Árna Stefánssyni var margsinnis klappað lof í lófa á fundinum í dag. Hann tilkynnti eftir sveitarstjórnarkosningarnar í vor að hann væri hættur í pólitík eftir áratugastarf.
Guðmundur Ari Sigurjónsson þingflokksformaður Samfylkingarinnar var sjálfkjörinn í embætti varaformanns fram að landsfundi flokksins í vor.
