Bæjarráð Vestmannaeyja segir að fyrirtækið sem lagði nýju vatnslögnina þangað hafi viðurkennt í vikunni að tjónið á henni megi rekja til mistaka við lagningu. Þá hafi verkferlar um borð ekki verið viðunandi.
„Það sem við auðvitað krefjumst er að fá jafngóða lögn og nýja lögn hérna á milli. Við vorum að kaupa það, við ætlum ekki að sætta okkur við það, eðlilega, við viljum fá lögnina sem við keyptum,“ segir Eyþór Harðarson, formaður bæjarráðs.
Hann reiknar með að þau fái tjónið bætt að fullu. Heildarkostnaður hleypur á þremur milljörðum.
Nýja lögnin átti að vera til vara fyrir lögnina sem veitir vatni til Eyja núna en hún laskaðist fyrir þremur árum þegar akkeri togarans Hugins VE hafnaði á henni.
Í skoðun milli ráðuneyta
Vestmannaeyjabær reynir að fá nýju lögnina viðurkennda sem almannavarnalögn og kostnað við hana greiddan frá ríkinu.
„Þetta mál er í skoðun milli ráðuneyta,“ segir Eyjólfur Ármannsson innviðaráðherra.
Vatnsveitur eiga undir innviðaráðuneytið, almannavarnalög heyra undir dómsmálaráðuneytið og útgjöld ríkissjóðs heyra undir fjármálaráðuneytið.
- Þannig að það er ekki búið að ákveða hvort á að greiða fyrir þetta sem Vestmannaeyingar telja almannavarnalögn?
„Nei, það er í skoðun,“ svarar Eyjólfur.
Hvenær heldurðu að það komi niðurstaða í það? „Ég vona að það verði bara sem fyrst. Ég get ekki gefið nákvæma tímasetningu á það, því miður.“
Eyþór segir þetta samtal við ríkisstjórnina ganga hægar en þau hefðu óskað en hann er vongóður um jákvæð svör.
„Við getum sagt sem svo að ef ríkið myndi ekki viðurkenna þetta sem almannavarnamál, þá er það að segja, við skulum bara taka við 5000 manns upp á land ef þessi eina vatnslögn brestur. Það er engin skynsemi í því, ég er nokkuð hissa hvað þetta gengur hægt,“ segir Eyþór.
