„Nú er að nálgast okkur lægðardrag úr suðri og því fylgir úrkomusvæði sem kemur inn yfir Suðurland einhvern tímann í fyrramálið og svo á suðvesturhornið, og þar af leiðandi höfuðborgarsvæðið, einhvern tímann síðdegis og þá fer að rigna, meðal annars í borginni.“
Boðberi þessara tíðinda er Hera Guðlaugsdóttir, veðurfræðingur á Veðurstofu Íslands, sem ræðir við mbl.is en slær þann varnagla að spáin sé þó ekki albölvuð.
Einhver væta en engin ósköp
„Svo verður einhver væta dagana þar á eftir víða um land, en engin ósköp, og úrkomuminna norðaustan og austan til þar sem verður bjartara og mögulega hlýrra, sér til sólar og verður líklega hlýrra þegar líður á vikuna,“ segir veðurfræðingurinn.
Hún segir mikið til verða um skúrir og skúraleiðingar að ræða á miðvikudag og fimmtudag um sunnan- og vestanvert landið í stað samfellds regns og hægan vind víðast hvar, fimm til þrettán metra á sekúndu þegar mest lætur.
„Annars er þetta ekkert til að hafa neinar áhyggjur af,“ segir Hera Guðlaugsdóttir að lokum af vætu næstu daga.
