Sagði Valkyrjurnar vilja Guðmund burt úr embætti annars biði hans stríð
Aðstoðarkona Guðmundar Inga Kristinssonar, fyrrverandi barna- og menntamálaráðherra, sendi honum skilaboð þar sem fram kom að hann þyrfti að segja af sér, hinn valkosturinn væri stríð.
Aðstoðarkona Guðmundar Inga Kristinssonar, Guðbjörg Ingunn Magnúsdóttir, sendi afarkosti á Guðmund Inga þar sem honum voru boðnir tveir kostir: að segja af sér embætti mennta- og barnamálaráðherra eða fara í stríð.
Þetta kemur fram í umfjöllun RÚV í dag þar sem smáskilaboð Guðbjargar til Guðmundar eru birt.
Skilaboðin fékk hann þann 7. janúar síðastliðinn og voru send í gegnum Signal, sem er dulkóðað samskiptaforrit. Guðmundur Ingi sakaði formann Flokks fólksins, Ingu Sæland, um að hafa bolað sér úr embætti gegn sínum vilja eftir skurðaðgerð sem hann gekkst undir í desember.
Því hefur Inga hafnað.
Guðmundur Ingi sagði af sér embætti og hætti í flokknum skömmu síðar. Hann hefur setið utan flokka á Alþingi síðan en lýst yfir stuðningi við ríkisstjórnina.
Í skilaboðum Guðbjargar sem birt eru á RÚV segir orðrétt: „Þessi ákvörðun er eingöngu valkyrjanna en ekki þeirra sem sitja eftir í flokknum. [...] En fyrst svona er komið þá er hægt að fara tvær leiðir – tilkynna veikindaleyfi og að þú munir snúa til baka á Alþingi þegar þú hefur heilsu til eða fara í stríð.“
Leiðtogar ríkisstjórnarinnar, þær Kristrún Frostadóttir forsætisráðherra, Þorgerður Katrín Gunnarsdóttir utanríkisráðherra og Inga Sæland, mennta- og barnamálaráðherra, fengu snemma viðurnefnið Valkyrjurnar.
Fyrr í skilaboðunum vísar Guðbjörg jafnframt til samtals Guðmundar Inga við mann að nafni Sigurjón. „Sigurjón hringdi mig og sagði mér frá samtalinu ykkar,“ skrifar hún. Sigurjón sem þar er vísað til er að öllum líkindum Sigurjón Arnórsson, aðstoðarmaður Ingu Sæland.
Spurning um upplifun
Inga Sæland sagði í viðtali á RÚV, þegar Guðmundur steig fram í september og sakaði hana um að hafa bolað sér úr embætti, að hún upplifði samskipti sín við Guðmund Inga með allt öðrum hætti. Hún hafnaði því að honum hefði verið gert að segja af sér.
„Nei, ég gerði honum ekkert slíkt. Hann er að lýsa sinni upplifun og ég virði það, en hún er allt önnur en upplifun mín,“ sagði Inga í viðtalinu.
Í frétt RÚV kemur fram að Guðmundur Ingi hafi sagt í samtali við fréttastofu að skilaboðin hefðu verið hótun. Öllum hafi verið ljóst að hann vildi ekki láta af embætti.
„Það var bara verið að hóta mér stríði.“
„Það var verið að setja mér afarkosti og það hafði þegar verið gert. Það átti að gera mér það alveg ófært að vera áfram ráðherra.“
Guðmundur Ingi segir að sig hafi snemma farið að gruna að vilji væri fyrir því að skipta honum út úr ríkisstjórn. Hann segist virða þá ákvörðun en honum blöskrar hvernig farið var að því að bera ákvörðunina undir hann og fá hans samþykki. „Það er alvarlegt mál þegar formaður flokks sendir aðstoðarmann sinn til að segja mér hvernig ég eigi að segja af mér,“ sagði Guðmundur.
Þá hafi honum brugðið við skilaboðin frá sínum aðstoðarmanni. „Það var bara búið að ræða þetta og ákveða það og ef ég myndi berjast gegn því þá yrði það bara stríð. Það var bara verið að hóta mér stríði.“
Hann segir sér hafa verið stillt upp við vegg og þess vegna ákveðið að verða við því að hætta.
Ragnar Þór Ingólfsson tók skömmu síðar við embætti félags- og húsnæðismálaráðherra, samhliða því að Inga tók við ráðuneyti Guðmundar Inga. Guðbjörg Ingunn, sem sendi Guðmundi skilaboðin þar sem honum voru settir fram tveir kostir, er eiginkona Ragnars Þórs.
