Kyrrstæð lægð við norðausturströndina beinir svalri norðanátt inn
yfir norðvestanvert landið með talsverðri rigningu og jafnvel
slyddu, einkum á Ströndum og norðanverðum Vestfjörðum. Þar eru skriðuviðvaranir í gildi fram á mánudagsmorgun.
Þetta er meðal þess sem kemur fram í veðurpistli frá Veðurstofu Íslands.
Í öðrum landshlutum fremur hæg breytileg átt og mildara veður. Væta með köflum suðaustan- og austanlands en annars úrkomulítið.
Hiti á bilinu 3–11 stig, svalast á Vestfjörðum.
Það er útlit fyrir svipað veður fram á morgundaginn, en þá styttir væntanlega
upp eystra. Á þriðjudag og miðvikudag er spáð stífri austlægri átt
og verður væntanlega býsna vætusamt á stærstum hluta landsins.
