Lögreglan á höfuðborgarsvæðinu hafði í ýmsu að snúast frá klukkan 5 til 17 í dag en alls voru 81 mál skráð í kerfi lögreglu á tímabilinu. Enginn var í fangageymslu þegar dagbókin var tekin saman.

Alvarlegasta atvikið átti sér stað í Breiðholti, þar sem tilkynnt var um þjófnað úr verslun. Sá sem grunaður er um þjófnaðinn ógnaði starfsfólki verslunarinnar með hnífi en var farinn af vettvangi þegar lögreglu bar að garði. Ekki kemur fram í dagbók lögreglu hvort maðurinn hafi fundist síðar.

Þá var tilkynnt um þjófnað úr verslun í Garðabæ. Lögregla afgreiddi málið á vettvangi.

Annar þjófnaður var tilkynntur í Grafarvogi. Þar hafði heilli pallettu af svörtum gúmmímottum verið stolið. Gerandi er óþekktur samkvæmt upplýsingum lögreglu.

Þrír ökumenn voru jafnframt stöðvaðir vegna gruns um akstur undir áhrifum fíkniefna. Tveir þeirra voru stöðvaðir í Hafnarfirði og sá þriðji í Kópavogi. Ökumennirnir voru allir látnir lausir að lokinni blóðsýnatöku.

Auk þess sinnti lögregla almennu eftirliti og ýmiss konar aðstoð á höfuðborgarsvæðinu. Lögregla tekur fram að upptalningin í dagbókinni sé ekki tæmandi.