Einar Logi hefur vakið mikla athygli eftir að hann birti tvö myndskeið úr svínabúum Stjörnugríss á Instagram og Facebook þar sem meðal annars má sjá dauð svín og dýr með áverka.
Forsvarsmenn fyrirtækisins hafa harðlega gagnrýnt framferði hans og segja myndskeiðin gefa villandi mynd af aðbúnaði dýranna. Þeir hafa bent á að Einar Logi hafi tvívegis brotist inn í svínabú fyrirtækisins og að ástand dýranna sem sjáist á upptökunum megi rekja til fyrra innbrotsins, þegar hann hleypti svínum lausum úr stíum sínum.
Einar Logi hafnar þeirri skýringu.
„Það er bara allt rangt sem forsvarsmaður Stjörnugríss segir. Öll myndskeiðin sem ég hef birt voru tekin áður en ég hleypti svínunum út,“ segir Einar Logi um ásakanir forsvarsmanna fyrirtækisins í samtali við Vísi.
Aðspurður hvort hann hafi tekið myndskeið eftir að hann hleypti svínunum út segir hann:
„Nei, ég hef ekki tekið upp nein myndskeið eftir að ég hleypti þeim út, að minnsta kosti ekki birt neitt slíkt.“
Hann segir fyrra myndskeiðið sem birtist í gær að öllu leyti vera úr búinu þar sem hann hleypti svínunum lausum. Stærstur hluti seinna myndskeiðsins sé hins vegar úr öðru svínabúi Stjörnugríss á Kjalarnesi þar sem hann hafi ekki opnað stíurnar.
„Fyrsta myndbandið er allt úr sama búinu, þar sem ég hleypti svínunum út. Flestar klippurnar í seinna myndbandinu eru hins vegar úr öðru svínabúi á Kjalarnesi sem Stjörnugrís á einnig aðild að,“ segir hann.
Hér að neðan má sjá fyrra myndbandið sem Einar Logi birti. Rétt er að vara við myndefninu.
„Í því búi sá ég mörg dauð svín liggjandi á gólfinu, en þar hleypti ég engum svínum út.“
Einar Logi viðurkennir þó að hann geti ekki fullyrt að engin dýr hafi slasast eftir að hann opnaði stíurnar.
„Ég veit ekki hvort einhver dýr hafi meiðst eftir að ég hleypti þeim út,“ segir hann.
Reyndi að koma fyrir falinni myndavél í gasklefa
Einar Logi upplýsir að það hafi verið tilraun hans til að koma fyrir falinni myndavél í sláturhúsi Stjörnugríss sem varð til þess að upp komst um hann.
„Ég fór inn í sláturhús Stjörnugríss og reyndi að koma fyrir falinni myndavél í gasklefanum sem er notaður þar,“segir hann.
Starfsmaður hafi komið að honum á meðan hann var að koma myndavélinni fyrir.
„Á meðan ég var að setja myndavélina upp kom starfsmaður að mér. Mér tókst að hlaupa á brott en var síðan handtekinn á vinnustað mínum um viku síðar,“ segir hann.
Hann segir lögreglu hafa lagt hald á tölvur, myndavélar, fatnað og skó við rannsókn málsins.
„Ég hef ekkert heyrt frá lögreglunni síðustu tvo mánuði þrátt fyrir að hafa ítrekað haft samband og óskað eftir að fá eigur mínar aftur,“ segir hann.
Hann segir lögreglu jafnframt hafa allar myndbandsupptökurnar undir höndum.
„Ég fór bara inn og tók upp“
Einar Logi segist hafa farið inn í alls fimm bú, þrjú svínabú og tvö alifuglabú. Í tveimur þeirra hafi hann hleypt dýrum lausum.
„Í sumum búanna fór ég einfaldlega inn, tók upp myndskeið og gerði ekkert annað,“ segir hann.
Hér að neðan má sjá seinna myndbandið sem Einar Logi birti síðdegis. Hann segir það að mestu leyti vera tekið upp í öðru svínabúi Stjórnugríss. Rétt er að vara við myndefninu.
Hann segir fyrstu tvær aðgerðirnar hafa verið í svínabúi Stjörnugríss á Kjalarnesi og Reykjabúinu.
„Ég fór fyrst inn í svínabú Stjörnugríss á Kjalarnesi. Upphaflega var markmið mitt að hleypa svínunum út.“
„Ég var líka með símann til að taka upp myndskeið, en það var ekki aðaltilgangurinn. Ég ætlaði fyrst og fremst að hleypa dýrunum lausum.“
Hann segir að eftir fyrstu tvær aðgerðirnar hafi hann breytt um aðferð og ákveðið að einbeita sér að myndbandsupptökum.
„Hélt að svínin myndu hlaupa glöð út“
Einar Logi segist hafa gert sér allt aðrar hugmyndir um viðbrögð dýranna þegar hann opnaði stíurnar.
„Ég hélt að þegar ég hleypti þeim út yrði það svipað og þegar kúm er hleypt út á vorin. Að svínin myndu hlaupa út glöð, en það gerðist ekki.“
Svínin hafi lítið annað þekkt en stíurnar sínar og því ekki brugðist við eins og hann hafði búist við.
„Þau þekkja ekkert annað en stíurnar sínar og löbbuðu því bara um inni í húsinu.“
Hann segir að það hafi fljótlega runnið upp fyrir honum að takmarkaður tilgangur væri með því að hleypa dýrunum lausum.
„Það skilaði ekki þeim árangri sem ég hafði vonast eftir“
Aðgerðin hafi fyrst og fremst verið hugsuð sem mótmæli gegn aðbúnaði dýra í matvælaframleiðslu.
„Ég veit ekki hvort þetta hafi valdið þeim skaða“
Forsvarsmenn Stjörnugríss hafa sagt að innbrot Einars Loga hafi haft alvarlegar afleiðingar fyrir dýrin. Meðal annars hafi svín slasast og drepist og gyltur fætt dauða grísi eftir að hann opnaði stíurnar.
Einar Logi hafnar því að hafa valdið þeim áverkum sem sjáist á myndskeiðunum en viðurkennir að hann viti ekki með vissu hvort aðgerðir hans hafi valdið dýrum skaða.
„Auðvitað var það nokkuð öfgakennt af mér að hleypa svínunum út. Ég veit hins vegar ekki hvort það hafi valdið þeim einhverjum skaða,“ segir hann.
Hann segir að þegar hann fór inn í búið í síðara skiptið hafi hann séð dauð svín áður en hann opnaði stíurnar.
„Dýrin sem sjást í myndböndunum tveimur voru dauð og særð þegar éeg kom þangað.“
Hann telur ekki að nein dýr hafi drepist vegna seinni aðgerðarinnar.
„Svínin sem ég sá dauð voru öll dauð áður en ég hleypti hinum út,“ segir hann.
„Versta aðstaðan sem ég sá“
Einar Logi segir að aðbúnaður dýranna hafi verið verstur í svínabúi Stjörnugríss á Brimnesi á Kjalarnesi.
„Versti aðbúnaðurinn sem ég sá var í svínabúi Stjörnugríss á Kjalarnesi, þar sem fyrra myndskeiðið eða það sem birtist í gær var tekið.“
Hann segir að ástandið hafi einnig verið slæmt í öðru svínabúi fyrirtækisins á Kjalarnesi.
„Aðbúnaðurinn var líka mjög slæmur í hinu svínabúinu á Kjalarnesi, en síðara myndefnið er mest megnis þaðan,“ segir hann.
Forsvarsmenn Stjörnugríss hafna lýsingum hans og hafa vísað til reglulegs eftirlits með starfseminni. Matvælastofnun hefur boðað að myndskeiðin verði skoðuð. Einar Logi segir stofnunina ekki hafa haft samband við sig.
„Nei, ég hef ekki heyrt neitt frá Matvælastofnun.“
„Það var lítill tilgangur með því að hleypa þeim út“
Einar Logi segist hafa verið vegan í sjö ár en ákvörðunin um að grípa til aðgerða hafi verið tekin eftir að hann horfði á heimildarmyndina Dominion á síðasta ári.
„Ég hef verið vegan í sjö ár og vissi að aðbúnaður dýra í svína-, kjúklinga- og kalkúnabúum gæti verið slæmur.“
„En eftir að hafa horft á heimildarmyndina fannst mér ekki nóg að vera bara vegan. Ég taldi mig þurfa að gera eitthvað til að stuðla að breytingum.“
Hann segist ekki sjá mikið eftir innbrotunum þótt hann viðurkenni að takmarkaður árangur hafi náðst með því að hleypa dýrunum lausum.
„Ég hleypti svínunum út til að mótmæla þessum iðnaði en það hafði í raun lítinn tilgang. Þau voru einfaldlega sett aftur inn í stíurnar daginn eftir,“ segir hann.
Hann vonast þó til þess að myndskeiðin verði til þess að fólk hugsi sig betur um varðandi neyslu á svínakjöti.
„Héðan í frá mun ég berjast á löglegan hátt“
Einar Logi segist staðráðinn í að halda áfram baráttu sinni fyrir bættum aðbúnaði dýra en ætli ekki að brjótast aftur inn í bú.
„Já, ég er alveg hættur því. Héðan í frá mun ég berjast fyrir bættum aðbúnaði dýra á löglegan hátt.“
Hann segist ekki vita hvað taki við í lögreglumálinu eða hvaða afleiðingar aðgerðir hans muni hafa.
„Ég veit ekki hvað gerist næst. Ég vona bara að þessi iðnaður leggist af eða að aðbúnaður svínanna batni verulega. Ástandið eins og það er núna er ekki boðlegt.“
Hann segir að markmið hans sé fyrst og fremst að sem flestir fái að sjá þann aðbúnað sem hann varð vitni að.
„Ég er bara að reyna að gera mitt besta til að fólk sjái hversu slæmur aðbúnaður svínanna er,“ segir Einar Logi að lokum.
„Ég veit ekki hvað gerist næst. Ég vona bara að þessi iðnaður leggist af eða að aðbúnaður svínanna batni verulega. Ástandið eins og það er núna er ekki boðlegt.“
