Sigríður Björk Guðjónsdóttir, fyrrverandi ríkislögreglustjóri, hefur hafið störf í mennta- og barnamálaráðuneytinu. Hún verður sérfræðingur þar eftir að hafa gegnt sömu stöðu í dómsmálaráðuneytinu eftir að hún lét af embætti ríkislögreglustjóra í nóvember.
Vísir greindi frá vistaskiptum Sigríðar Bjarkar í frétt í dag og vísaði þar til skráningar starfsmanna á síðum viðkomandi ráðuneyta.
Sigríður Björk hætti sem ríkislögreglustjóri eftir að í ljós kom að embættið hafði greitt ráðgjafarfyrirtæki 160 milljónir króna á fimm árum. Það varð til þess að deilt var á ríkislögreglustjóra og fjármálastjórn embættisins.
Sigríður Björk skrifaði færslu á Facebook-síðu sína eftir að fréttin var birt. Hún vísar þar til þess að hún óskaði eftir flutningi úr embætti ríkislögreglustjóra í starf sérfræðings í dómsmálaráðuneytinu í stað þess að fá starfslokasamning.
Sigríður Björk segist hafa viljað gera gagn en síðan ekki fundist starfskraftar hennar nýtast sérlega vel í dómsmálaráðuneytinu þar sem hún hefði verið í nefndum og starfshópum á vegum þrettán ráðherra í því embætti og fáu hægt að bæta við. Hún segir að annar taktur og ný verkefni séu í mennta- og barnamálaráðuneytinu sem hún hafi mikla trú á.
„Ég átti því samtal við ráðherra og í kjölfar þess óskaði ég eftir flutningi til mennta- og barnamálaráðuneytis. Sá flutningur var ákveðinn um miðjan mars og hefur því ekkert að gera með það að nýr samskiptastjóri í DMR [dómsmálaráðuneytinu] sé fréttamaðurinn sem fjallaði um mín mál enda var hann eflaust að gera sitt besta.“
Upplýsingafulltrúinn sem Sigríður Björk vísar til er Freyr Gígja Gunnarsson, fyrrverandi fréttamaður RÚV.
Skref í að efla vinnu við farsældarlöggjöf
Í svari upplýsingafulltrúa dómsmálaráðuneytisins við fyrirspurn fréttastofu segir að dómsmálaráðuneytið og mennta- og barnamálaráðuneytið hafi gert með sér samkomulag í mars um að Sigríður Björk færi tímabundið til starfa hjá síðarnefnda ráðuneytinu til eins árs, þar sem hún muni vinna að verkefnum tengdum farsæld barna.
Mikil vinna hafi átt sér stað um ofbeldi meðal barna og ungmenna í tengslum við farsældarlöggjöfina í víðtæku samráði ráðuneyta og stofnana. Sigríður Björk hafi, sem lögreglustjóri og ríkislögreglustjóri, mikla þekkingu og reynslu af málaflokknum.
„Mikilvægt þykir að efla enn frekar vinnu í tengslum við farsældarlöggjöfina, þvert á ráðuneyti, meðal annars með áherslu á forvarnir, og koma Sigríðar í mennta- og barnamálaráðuneytið er til að undirstrika það mikilvægi.“
Fréttin var uppfærð með svari dómsmálaráðuneytisins.
