Náttúruverndarstofnun hefur ákveðið að hafna öllum leyfisbeiðnum um drónaflug í afþreyingar- og fræðsluskyni á 26 friðlýstum svæðum víðs vegar um landið. Áður fyrr gátu ljósmyndarar sótt um leyfi og fengið það hjá Náttúruverndarstofnun Íslands.
Að sögn Jeroen Van Nieuwnhove ljósmyndara hefur það gengið snuðrulaust fyrir sig undanfarin ár, allt þar til nú. Þann 17. maí tók gildi ný stjórnsýsluframkvæmd Náttúruverndarstofnunar vegna truflunar og óhappa, sem gerir það að verkum að leyfum fyrir drónaflugi í afþreyingar- eða fræðsluskyni er hafnað. Hins vegar eru leyfi veitt fyrir drónaflugi í atvinnuskyni eins og kvikmynda- eða auglýsingagerð.
Margt skaðlegra náttúru en drónar
Ljósmyndarafélag Íslands hefur lýst yfir þungum áhyggjum af stöðunni sem upp er komin og segir hana skerða atvinnufrelsi félagsmanna sinna. Þeir benda á í sinni yfirlýsingu að afskaplega margt sé skaðlegra fyrir náttúru og þjóðgarða landsins heldur en drónaflug og taka sem dæmi þyrluflug, fjórhjól og rútur. Einnig telja þeir að það að banna einum hópi en leyfa öðrum sama hlutinn sé mismunun og byggi ekki á neinum rökum eða gögnum. Lítið sem ekkert samráð hafi verið haft um málið og óska þeir eftir opnu samtali við stofnunina.
„Við viljum fyrst og fremst bara samtal og styðja þá félagsmenn sem gætu verið að lenda í leiðindum vegna þessa. Þetta gæti bara haft gríðarleg áhrif á rekstur fólks. Við viljum að framkvæmdirnar verði endurskoðaðar og við viljum sjá gögn sem styðja rannsóknir Náttúruverndarstofnunar. Við erum svo opin fyrir formlegu samráði við stofnunina um að semja regluverk sem allir geta unað við,“ segir Rán Bjargardóttir, talsmaður Ljósmyndarafélags Íslands.
