Ragnar Freyr Ingvarsson læknir segir í harðorðri Facebook-færslu að hann hafi fengið bréf frá Landspítalanum þar sem reifuð séu ósannindi um aðdraganda þess að honum var sagt upp störfum á spítalanum en Ragnar Freyr var þar í hlutastarfi. Boðar Ragnar Freyr málsókn.
Nokkuð hefur verið fjallað um uppsögn Ragnars Freys en hann er einn þekktasti læknir landsins. Hann hefur rakið uppsögnina meðal annars til þess að hann sé formaður Læknafélags Reykjavíkur og virkur þátttakandi í opinberri umræðu um heilbrigðismál. Spítalinn segir hins vegar málið snúast um hagræðingu og að stefnt sé að því að læknar á spítalanum séu þar í fullu starfi.
Ragnar Freyr segir að honum hafi fyrir helgi borist bréf frá Rafni Benediktssyni framkvæmdastjóra bráða-, lyflækninga- og endurhæfingarþjónustu Landspítalans en Ragnar Freyr starfaði á lyflækningadeild á spítalanum. Hann segir ljóst að Rafn hafi ekki samið bréfið upp á eigin spýtur:
„Bréfið er skrifað með aðstoð lögfræðinga og starfsfólks mannauðsdeildar og með fullri vitund og samþykki Runólfs Pálssonar forstjóra spítalans. Þar reynir hann að færa rök fyrir uppsögn minni.“
Ragnar Freyr segir bréfið einkennast af ósannindum:
„Undan þeim svíður.“
Hringja
Ragnar Freyr gerir síðan nánari grein fyrir því sem hann segir vera ósannindi í bréfinu:
„Í bréfinu er fullyrt að ítrekað hafi verið reynt að ná í mig. Yfirlit úr síma mínum segir aðra sögu. Það var hringt í mig í tvígang miðvikudaginn 8.apríl – klukkan 17:49 og svo 18:07 – ég hringdi svo tilbaka nær samstundis. Engin önnur símtöl bárust frá Landspítala þennan dag eða dagana á undan. Rafn fullyrðir er að mér hafi EKKI verið sagt upp í símtalinu. Það er rangt! Hann var alveg skýr um að það væri verið að leggja niður starfið mitt og mér því sagt upp. Aðspurður sagði hann ríka aðhaldskröfu vera á spítalanum.“
Ragnar Freyr birtir bréfið í heild með færslunni en það er stílað á lögmann hans. Í færslunni segir hann Rafn vita betur en það sem fullyrt sé í bréfinu af hans hálfu:
„Það veit Rafn Benediktsson mæta vel þó hann kjósi að segja aðra sögu. Hann er skýrmæltur maður og boðskapurinn stuttur og hnitmiðaður eins hans er von og vísa. Rafn kom fram í viðtölum í fjölmiðlum snemma morguninn eftir. Þar var hann margsaga um samtal okkar. Farsinn er vel skráður í uppfærðum fréttum fjölmiðla þennan dag. Hann gengur svo langt að fullyrða að mér hafi verið boðið aukið starfshlutfall í umræddu símtali og ég hafi átt að hugleiða slíkt fram að fundi okkar.Þetta er alrangt! Um slíkt var aldrei rætt. Fréttir af þessu las ég fyrst í fjölmiðlum daginn eftir.“
Dómur
Ragnar Freyr segir að í bréfinu séu að auki fjöldi annarra atriða sem vert sé ræða. Það sé efni í frekari pistla og verði einnig úrlausnarefni dómstóla:
„Að standa í þessu ströggli er að mörgu leyti lærdómsríkt. Það er ótrúlegt að verða vitni að framferði stjórnenda Landspítala í minn garð. Eftir allt sem á undan er gengið, farsælt starf og samvinnu með frábæru samstarfsfólki síðasta áratuginn. Að leggjast svo lágt að segja ósatt til að réttlæta gjörðir sínar. Að réttlæta ólögmæta uppsögn. Réttara hefði verið að biðjast afsökunar á þessu mistökum og axla ábyrgð. Af því hefði allavega verið einhver sómi.“
