Flavio Bolsonaro, sem tapaði fyrir Lula Da Silva í forsetakosningum í Brasilíu á sunnudag, er lentur í Bandaríkjunum. Myndir voru teknar af honum á flugvellinum á Miami á Flórída í dag. Hann yfirgaf flugvél í lögreglufylgd og tjáði sig ekki við fjölmiðla. Búist er við að hann haldi blaðamannafund á morgun.
Honum hafði verið gert að afhenda vegabréf sitt í Brasilíu eftir ósigurinn en neitaði. Á leið sinni til Bandaríkjanna lenti hann í Argentínu og Ekvador. Með honum í för voru eiginkona hans og börn. Bolsonaro neitaði að viðurkenna ósigur í kosningum.
Fjölmiðlar í Bandaríkjunum hafa eftir embættismanni að fjölskylda Bolsonaro hafi fengið vegabréfaáritun til að koma til Bandaríkjanna. Trump Bandaríkjaforseti sagði í gær að hann myndi samþykkja að þau flyttu þangað. „Þau eru fínasta fólk. Þetta voru mjög furðulegar kosningar og mér fannst þær alveg ferlegar,“ sagði Trump á kosningafundi í Texas í gær. Eitt af kosningaloforðum Bolsonaros var að efla tengslin við Bandaríkin.
Lula Da Silva hafði óvænt betur en Bolsonaro í kosningunum á sunnudag og situr því áfram sem forseti. Hann sagði flóttann lýsandi fyrir Bolsonaro-fjölskylduna. Brasilía væri þeirra annað heimaland, það fyrsta væru Bandaríkin.
Bolsonaro er sonur Jairs Bolsonaros, fyrrum forseta Brasilíu, sem er í stofufangelsi fyrir tilraun til valdaráns eftir að hann tapaði í forsetakosningum 2022. Bolsonaro yngri er til rannsóknar í Brasilíu fyrir peningaþvætti.
