„Þetta er stærsta ákvörðun sem hefur verið tekin í svona málum á Íslandi. Þetta á sér engin fordæmi, þau uppkaup sem áttu sér stað og það er auðveldara sagt en gert að byrja og hefja það ferli,“ sagði Kristrún Frostadóttir út í gagnrýni á enduruppbyggingu Grindavíkur.
Ólafur Adolfsson spurði Kristrúnu út í endurreisn Grindavíkur í óundirbúnum fyrirspurnartíma á Alþingi í morgun, einkum út í húsnæðismál. Sagði hann að daglega væru unnin um 1400 störf í bænum en stærstur hluti þyrfti að keyra til Grindavíkur úr öðrum sveitarfélögum vegna þess að ekki væri hægt að fá húsnæði í bænum.
Fólk hafi rekið sig á vegg hjá fasteignafélaginu Þórkötlu, sem keypti upp húsnæði í bænum eftir rýmingu, sem hafi gert hlé á veitingu gistilheimilda í bænum. „Sem er mikið bakslag og gríðarleg vonbrigði fyrir þá sem hugðust fá gistisamninga fyrir sumarið og máta sig við aðstæður og nýjan veruleika í Grindavík,“ sagði Ólafur og bætti við að upplifun bæjarbúa sé sú að verið væri að „svæfa málið í nefnd“.
Kristrún sagðist sýna því skilning að Grindvíkingar væru orðnir óþreyjufullir að snúa aftur heim. Hins vegar þurfi að horfa til þess að atburðurinn sé enn í gangi og mikið kvikumagn hafi safnast undir Svartsengi. „Það liggur alveg fyrir að áður en farið verður af stað með ákveðna hluta endurreisnar þá þarf okkur að líða aðeins betur með stöðuna varðandi jarðhræringar, meðal annars mat á hver ásættanleg áhætta til búsetu þarna á svæðinu, með tilliti til skólahalds og annað.”
Ólafur spurði hvort ekki væri rétt að treysta Grindvíkingum í þessum efnum. Þeir upplifi að þeir séu ekki hafðir með í ráðum og ekki verði annað séð en að ríkisstjórnin hafi það á stefnu sinni að hægja á endurreisninni í stað þess að hraða henni.
„Staðan er þessi: Grindavík er opin. Þar er búið og þar eru fjölskyldur og börn. Sveitarfélaginu ber að sinna grunnþjónustu og hefur því undirbúið skólahald næsta vetur. Það er búið að verja bæinn. Fyrri ríkisstjórn lét reisa varnargarða. Það er enginn í hættu innan bæjarmarka Grindavíkur. Það er búið að skanna hvern fermetra og búið að girða af hættusvæði, búið að laga öll önnur svæði með því að fylla í sprungur. Vandinn er þessi: Fólk fær ekki íbúðarhúsnæði. Fasteignafélagið Þórkatla, sem er í 99 prósent eigu ríkisins, vill ekki láta húsnæði af hendi til íbúa þannig að fólk getur ekki flutt heim,” sagði Ólafur og spurði hvers vegna ríkisstjórnin kæmi ekki bara hreint fram og keypti upp restina af Grindavík og lokaði bænum.
Endurkaupaáætlun á lokametrunum
Kristrún sagði það vilja allra að endurreisnin fari sem hraðast af stað. Það skipti máli hvernig það er gert og nú sé verið að leggja lokahönd á ákveðin lagaleg álitaefni er varða endurkaupaáætlunina.
„Þau vilja gera þetta með skynsamlegum hætti. Þau vilja vera með vaðið fyrir neðan sig. Þetta er stærsta ákvörðun sem hefur verið tekin í svona málum á Íslandi. Þetta á sér engin fordæmi, þau uppkaup sem áttu sér stað hér áður og það er auðveldara sagt en gert að byrja og hefja það ferli. Það er ekki þannig að ríkisstjórnin eða Þorkatla sé að reyna að halda aftur af endurreisn. Þvert á móti er verið að reyna að gera þetta með réttum hætti [...] að við lendum ekki í óþarfa áföllum á leiðinni sem haldi aftur af framtíðarendurreisn.”
