Páll Vilhjálmsson skrifar:
Í gær varð RÚV að leiðrétta frétt um að Páll skipstjóri Steingrímsson hafi í þrígang hótað Helga Seljan fréttamanni RÚV. Ríkisfjölmiðillinn var knúinn til að leiðrétta sömu fréttina tvisvar sama daginn.
RÚV átti í samstarfi við dönsku útgáfuna Berlingske að sverta mannorð skipstjórans. Tveir fréttamenn, Aðalsteinn Kjartansson á Heimildinni og Helgi Seljan, voru aðalheimildarmenn Berlingske um að tveir Pálar stæðu íslenskri blaðamennsku fyrir þrifum. Einn er skipstjórinn en hinn tilfallandi bloggari.
Í frétt Berlingske er haft eftir Helga Seljan að Páll skipstjóri hafi hótað sér og öðrum blaðamönnum. Heiðar Örn Sigurfinnsson fréttastjóri viðurkennir að hafa fengið fréttina áður en hún birtist í dönsku útgáfunni, eins og kemur fram í umfjöllun Nútímans. Til að gera hlut Páls skipstjóra sem verstan þrefaldaði RÚV hótanir hans í garð Helga Seljan og sagði í sinni frétt:
Berlingske hefur eftir Helga að Páll Steingrímsson hafi að minnsta kosti í þrígang sent honum hótanir í tengslum við umfjöllun hans um Samherja, sem og öðrum blaðamönnum. (feitletr. pv)
í frétt Berlingske sagði aðeins að um hótun hafi verið að ræða; RÚV bætti um betur og sagði að hótun hafi verið höfð í frammi í þrígang. Engin gögn eru til stuðnings, aðeins orð Helga Seljan.
Páll skipstjóri fór fram á leiðréttingu á RÚV strax eftir birtingu, sunnudagskvöldið 19. apríl. Hann kannast ekki við að hafa nokkru sinni hótað Helga eða öðrum blaðamönnum. Rúm vika leið áður en RÚV svo mikið sem svaraði erindinu. Venjan er að fjölmiðill sem birtir alvarlegar ásakanir á hendur nafngreindum einstaklingum beri þær undir viðkomandi. Hvorki bauð RÚV Páli skipstjóra að bera hönd fyrir höfuð sér né féllst fréttastofan á að leiðrétta rangfærsluna. Þar brýtur RÚV á Páli skipstjóra bæði skráðar og óskráðar siðareglur. Málið er því alvarlegra að fréttamaður RÚV ber fram ásakanir í eigin nafni og án nokkurra heimilida - nema eigin heilaspuna.
Í gær, átta dögum eftir fréttina, bregst RÚV við og byrjar á því að vísa skipstjóranum á Berlingske. Ábyrgðin á fréttum RÚV liggur sem sagt í Danmörku. Skipstjórinn vakti athygli RÚV að Berlingske sagði ekki í sinni frétt að þrjár hótanir væri að ræða. Heiðar Örn fréttastjóri játaði þá að um samstarf hefði verið að ræða milli RÚV og Berlingske og líklega hefði RÚV ekki fengið rétta útgáfu fréttarinnar. Hófst nú leiðréttingarferli á Efstaleiti.
Rúmlega klukkan eitt í gær breytti RÚV upphaflegu fréttinni. Í nýrri útgáfu var fellt út að skipstjórinn hafi hótað Helga í þrígang. Páll skipstjóri kannast ekki við að hafa nokkru sinni hótað fréttamanninum. Síðdegis í gær var fréttin leiðrétt í annað sinn. Nýjasta útgáfan um hótanir hljómar svona:
Berlingske hefur eftir Helga að Páll Steingrímsson hafi ítrekað sent sér og öðrum blaðamönnum óbeinar hótanir í tengslum við umfjöllun hans um Samherja (feitletr. pv).
Hótanir í þrígang verða eftir tvær leiðréttingar ,,óbeinar hótanir". RÚV reynir að búa til flugufót fyrir upphaflegu ásökuninni, um þrjár hótanir, með því að tala um óbeina hótun. Allir læsir sjá í hendi sér að ríkisfjölmiðillinn er á flótta undan sjálfum sér. Hver er annars munurinn á hótun og óbeinni hótun?
Helgi Seljan er fréttamaður á RÚV og sem slíkur heimildarmaður dönsku útgáfunnar um hótanir skipstjórans. Heiðar Örn fréttastjóri og Stefán Eiríksson útvarpsstjóri geta ekki látið líðast að fréttamaður í nafni RÚV beri blákaldar lygar í erlenda blaðamenn í þeim tilgangi að endursegja lygarnar á RÚV með útlenskum stimpli. Samstarf var á milli Berlingske og RÚV um að koma á framfæri lygum Helga Seljan. RÚV fékk í hendur frétt Berlingske áður en hún birtist.
Ríkisfjölmiðillin er rækilega afhjúpaður sem rógsmiðill er margbrýtur skráðar og óskráðar siðareglur. Á Efstaleiti telja menn sér trú um að nóg sé að ,,biðjast velvirðingar" þegar um er að tefla innræti og eðli stofnunarinnar.
Hér er ekki um tæknileg mistök að ræða eða fljótfærni í dagsins önn. RÚV stendur fyrir skipulagðri aðför að mannorði Páls skipstjóra Steingrímssonar. Lygar um að skipstjórinn hóti blaðamönnum er beint framhald af aðild RÚV að byrlun, símastuldi og ólöglegri afritun vorið 2021. Þar var skipstjórinn brotaþoli en RÚV gerandi. Innræti og eðli RÚV þarf að rannsaka ofan í kjölinn, greina meinsemdina og fjarlægja.
