Vladimír Pútín Rússlandsforseti hafnar ásökunum þýskra yfirvalda um að Rússar hafi staðið að sprengjudrónaárásum á flugvöll í Leipzig í ágúst. Þá sakar hann Þjóðverja um að hafa komið sönnunargögnum fyrir á vettvangi til að koma sökinni á Rússa. Pútín tjáði sig um málið á blaðamannafundi í gærkvöld á leiðtogafundi Sjanghæ-ríkjavettvangsins í Bishkek í Kirgistan. Pútín lagði ekki fram sannanir máli sínu til stuðnings. Hann sagði Þjóðverja kenna Rússum um því kanslari landsins njóti ekki stuðnings meðal almennings.
Dularfullur dróni með sprengiefni fannst á flugvellinum í Leipzig í byrjun ágúst, nálægt úkraínskri flutningaflugvél. Grunur var um að annar dróni hefði rekist á flutningaflugvél á flugi nálægt flugvellinum. Skammt frá fannst lítið loftnet í tré. Talið er að það gæti hafa verið notað til að stjórna drónanum. Einnig voru vísbendingar um minniháttar sprengingu í skógi nálægt flugvellinum.
Á blaðamannafundi í gær sögðu Johan Wadephul utanríkisráðherra og Alexander Dobrindt innanríkisráðherra Þýskalands að samkvæmt lögreglurannsókn, ummerkjum árásanna og upplýsingum frá leyniþjónustu væri ljóst að Rússar hafi verið að verki. Það var í fyrsta sinn sem þýsk stjórnvöld saka Rússa opinberlega um atvikið. Þá var tilkynnt í gær að Þjóðverjar ætli að herða reglur um komur rússneskra ríkisborgara til landsins, auka þrýsting á skuggaflota Rússa og láta loka ræðisskrifstofu Rússlands í Bonn.
Sendiherra Rússlands í Þýskalandi sendi frá sér tilkynningu eftir blaðamannafund Pútíns og sagði þar að hann hafnaði ásökunum Rússlands alfarið. Þær væru „tilhæfulausar, fáránlegar og andstæðar heilbrigðri skynsemi“. Þá segir í yfirlýsingunni að ásakanir Þjóðverja séu „fordæmalaus stigmögnun samskipta Rússlands og Þýskalands“ og að hún hafi afleiðingar í för með sér.
