Helga Dögg Sverrisdóttir skrifar:

Þann 3. nóvember fara fram þingkosningar í Bandaríkjunum. Kosið verður um öll sæti í fulltrúadeild þingsins, alls 435 sæti, auk þriðjungs af 100 sætum öldungadeildarinnar. 

Nýjustu skoðanakannanir benda til meirihluta Demókrata í fulltrúadeildinni en jafna stöðu í öldungadeildinni.

Takist Demókrötum að ná meirihluta í báðum deildum getur Trump forseti gengið að því vísu að verða ákærður í embættisbrotsmáli, svo öruggt sem amen í kirkju. Það þýðir ekki að hann verði settur af, enda krefst það tveggja þriðju hluta atkvæða í öldungadeildinni, sem Demókratar munu ekki ná. En þetta niðurlægjandi ferli eitt og sér mun skemma að mestu störf forsetans næstu tvö árin.

Þegar sitjandi forseti sætir ákæru í embættisbrotsmáli stýrir forseti Hæstaréttar málsmeðferðinni. Hún er þó ekki lagalegs eðlis heldur pólitísk, þar sem það eru þingmennirnir sem skera úr um niðurstöðuna.

Ræða ekki það sem í boði er

Það má á ýmsan hátt líta á yfirstandandi kosningabaráttu sem aðdraganda þeirrar embættisbrotsmeðferðar sem Demókratar vinna að því að koma af stað eftir kosningarnar. Stjórnmálamennirnir ræða ekki hvað þeir hyggjast bjóða kjósendum upp á í formi velferðar, hagvaxtar og öryggis, heldur standa í frumstæðum slagsmálum eins og á ódýrri krárabúllu, þar sem öll skítabrögð eru leyfileg.

Demókratar tala eingöngu um hverjir þeir eru ekki, það er að segja Trump, sem þeir saka um tilraun til valdaráns 6. janúar 2021, kynþáttafordóma, misbeitingu valds og spillingu. Samkvæmt stjórnarskránni geta kynþáttafordómar og misbeiting valds ekki ein og sér leitt til ákæru í embættisbrotsmáli, en valdaránstilraun og spilling geta gert það.

Demókratar hafa líklega heldur ekki um marga aðra kosti að velja. Flokkurinn stendur án forystu. Kamala Harris, sem er bæði vanhæf og ógeðfelld, á ekki afturkvæmt í sviðsljósið eftir afhroðið í forsetakosningunum 2020. Gavin Newsom, ríkisstjóri Kaliforníu, á vart heldur möguleika á að verða leiðtogi flokksins eftir að hafa breytt Kaliforníu úr Hollywood í Gaza, þar sem götur eru fullar af saur manna og sprautunálum og ólöglegir innflytjendur búa í tjöldum og kofum úr pappakössum.

Repúblikanar beina þrumuræðu sinni gegn því sem þeir kalla hraða göngu Demókrata í átt að alræðislegum marxískum hugmyndum, þar sem ungir forystumenn á ysta vinstrivængnum ráða stefnu flokksins. Þar eru helst nefndur Mamdani, borgarstjóri New York, Alexandria Ocasio-Cortez, þingkona í fulltrúadeildinni, og Bernie Sanders, öldungadeildarþingmaður sem dáist að Sovétríkjunum. Þeir hafa um árabil gert sitt besta til að grafa undan hefðbundnu lýðræði Bandaríkjanna.

Framsæknar valdastéttir

Þegar Trump forseti tók við embætti af Joe Biden árið 2024 erfði hann Bandaríkin þar sem valdastéttirnar sættu sig við þá hugmynd að kynin væru að minnsta kosti þrjú, þar sem 53 milljónir manna, eða 17 prósent íbúanna, væru ekki fædd í landinu. Þar gat raðverslunarbrotamaður stolið vörum fyrir allt að 1.000 Bandaríkjadali án þess að verða sóttur til saka, vegna þess að dómarastéttin leit á glæpi sem félagslega hugsmíð.

Þetta hafði ekki gerst vegna lagasetningar á þingi, heldur vegna þess að svonefndar „framsæknar“ valdastéttir höfðu náð yfirráðum yfir grunnskólakerfinu, opinberum stofnunum, háskólunum, afþreyingariðnaðinum, atvinnuíþróttunum, efstu lögum atvinnulífsins og bæði hefðbundnum fjölmiðlum og samfélagsmiðlum.

Þetta er erfiður upphafspunktur fyrir íhaldssaman forseta, sem nú er sakaður um að hafa leitt Bandaríkin að efnahagslegu hengiflugi, þrátt fyrir að geta bent á góðan árangur af umbótastarfi sínu.

Árangur skiptir þó ekki máli í stjórnmálum. Það sem máli skiptir er sú frásögn sem nær yfirhöndinni þegar árangurinn er metinn. Og Demókratar og fjöldamiðlar þeirra hafa yfirhöndina í þeim efnum.

Samkvæmt gögnum hefur fátæktarhlutfall í Bandaríkjunum á öðru kjörtímabili Trumps lækkað svo met er slegið í 10 prósent, þrátt fyrir ásakanir Demókrata um að niðurskurður 400.000 opinberra starfa og brottvísun þúsunda ólöglegra innflytjenda hafi aukið fátækt í landinu.

Meðalárstekjur heimila hafa hækkað í 84.000 Bandaríkjadali, sem er hæsta hlutfall sem þekkist í heiminum. Framleiðsla í Bandaríkjunum náði metvexti í ágúst. Sama gildir um pantanir á málmum, vélum, tölvum og mælitækjum, sem hafa aukist verulega frá mánuði til mánaðar.

Níu af tíu

Bandaríkin eru nú stærsti olíuframleiðandi heims og stærsti útflytjandi jarðgass. Seðlabanki Bandaríkjanna í Atlanta metur það svo að verg landsframleiðsla Bandaríkjanna muni vaxa um heil 5 prósent á árinu. Bandarískt efnahagslíf hefur tekið kipp og er í mikilli uppsveiflu, atvinnuleysi er aðeins 4 prósent og hlutabréfavísitölurnar Dow Jones og S&P 500 hafa hækkað um 8 og 13,5 prósent frá áramótum.

Bandaríkin eru í fremstu röð á tæknisviðum á borð við stafræna miðlun, hugbúnað, gervigreind, líftækni og geimrannsóknir. Af tíu stærstu tæknifyrirtækjum heims eru níu bandarísk.

Auk efnahagslegs árangurs getur Trump státað af eftirtektarverðum árangri í utanríkismálum. Hann hefur þvingað hið seinvirka NATO til að efla vígbúnað sinn og standa á eigin fótum án þess að reiða sig á Bandaríkin sem stuðningshjól. Grænland er nú hluti af stefnumótandi öryggissvæði Bandaríkjanna. Kínverjum hefur verið ýtt út úr Panama og Venesúela, en forseti Venesúela sem Asger lýsir sem stalínista, situr í fangelsi í Bandaríkjunum.

Hvað sem gerist í stríðinu við Íran hefur komið í veg fyrir að klerkastjórnin þar geti aflað sér kjarnorkuvopna um langt árabil. Hamas hefur jafnframt verið þurrkað út og Hizbollah stórlega veikt.

Ekkert af þessu hjálpar Trump, því samkvæmt nýlegri skoðanakönnun RealClearPolitics eru tæplega 60 prósent kjósenda óánægð með hann sem forseta. Enn sjáum við að það er ekki sannleikurinn sem ræður úrslitum, heldur sú frásögn sem mynduð er af sannleikanum. Og íhaldssamt Bandaríkjafólk hefur tapað þeirri baráttu. (Feitletrun HD)

Á kostnað skattgreiðenda

Bandarískir kjósendur með stúdentspróf vilja Bandaríki þar sem sterkt og ráðandi ríkisvald sér um velferð og öryggi á kostnað skattgreiðenda. Með öðrum orðum vilja þeir hálfmarxískt forsjárkerfi af því tagi sem Evrópusambandið stendur fyrir.

Kjósendur án stúdentshúfu halda hins vegar fast í gömlu góðu Bandaríkin, þar sem frelsi ríkir og allir hafa tækifæri, svo fremi sem þeir eru tilbúnir að vinna og taka áhættu. Land hinna frjálsu og hugrökku, þar sem verkamaður getur orðið forstjóri og leikari forseti.

Miðkjörtímabilskosningarnar 3. nóvember munu ráða úrslitum um hvers konar Bandaríki við fáum í framtíðinni. Áhrif þeirra ná því langt út fyrir síðustu tvö ár Trumps sem leiðtoga þjóðarinnar.

Við verðum einfaldlega að gera okkur grein fyrir því að takist Demókrötum að ná meirihluta í báðum deildum Bandaríkjaþings er leikurinn tapaður. 

Asger Aamund, MIDTVEJSVALGET I USA: FOLKESTYRE ELLER FORMYNDERSTAT? – Asger Aamund