Franskur mótmælandi missti aðra höndina í borginni Saint-Etienne í dag. Þetta var annar mótmælandinn til að missa hönd í álíka aðstæðum í miklum mótmælum sem nú geisa í Frakklandi. Þann 5. október missti 15 ára nemi vinstri höndina þegar hvellsprengja sprakk fyrir utan skóla hans í Lens.
Mótmælin hófust í byrjun mánaðar þegar framhaldsskólanemar kröfðust betri aðbúnaðar í skólum. Þau snúast að mestu um háan framfærslukostnað. Samkvæmt verkalýðsfélaginu CGT hafa um 500 þúsund manns tekið þátt í 1.750 mótmælafundum víða um landið í dag.
Átök lögreglu og mótmælenda
Mótmælin hafa verið afar hörð. Grímuklædd ungmenni kveiktu til að mynda í ferðaskrifstofu í Lyon. Óeirðalögregla barði niður mótmælin með táragasi og vatnsfallbyssum. Í Marseille, næststærstu borg Frakklands, ruddust mótmælendur inn í ráðhúsið og ollu þar usla. Í borginni Lille í Norður-Frakklandi brutust mótmælendur inn á skrifstofu borgarstjórans og frömdu skemmdarverk.
Mótmælin eru haldin í skugga yfirvofandi forsetakosninga í Frakklandi. Emmanuel Macron Frakklandsforseti er á brottleið á næsta ári. Hann hefur þegar setið tvö kjörtímabil og getur því ekki gefið kost á sér í komandi kosningum.
Tugir þúsunda mótmælenda gengu um götur Parísar í dag og kölluðu eftir afsögn Macrons ásamt því að úthúða lögreglunni.
Lögregla hefur beitt svokölluðum hvellsprengjum og táragasi til að dreifa mótmælendum. Mótmælandi í Saint-Etienne missti höndina í dag en ekki liggur fyrir hvort það var vegna hvellsprengju eða táragashylkis.
