Héraðsdómur Reykjaness hefur dæmt karlmann í fjórtán mánaða fangelsi fyrir áttatíu og átta þjófnaðarbrot og eina tilraun til þjófnaðar yfir um eins og hálfs árs tímabil. Maðurinn var sakaður um að hafa stolið matvöru, snyrtivörum, raftækjum, fatnaði og fleiru úr ýmsum verslunum – og var virði þýfisins áætlað um 3,5 milljónir króna.
Virði þýfisins var afar breytilegt. Brotin vörðuðu allt frá því að maðurinn hafi stolið sælgæti og hnetum úr verslun Krónunnar að söluverðmæti rúmlega 800 króna í að hafa haft á brott með sér húðvörur úr Lyfju að andvirði samtals 238.116 króna.
Í dómsorðum segir að maðurinn hafi þar að auki rofið skilorð. Maðurinn játaði sök í öllum ákæruliðum nema einum. Auk fangelsisdómsins er honum einnig gert að greiða 800 þúsund krónur í sakarkostnað.
