Breski þingmaðurinn Rupert Lowe las í vikunni upp fjölda vitnisburða frá konum sem pakistönsku nauðgunargengin beittu hræðilegu ofbeldi í Bretlandi. Frásagnirnar voru kynntar sem hluti af rannsókn sem Lowe hefur staðið fyrir.
Vitnisburðirnir lýsa alvarlegu og langvarandi ofbeldi gegn ungum stúlkum, þar á meðal nauðgunum, líkamlegu ofbeldi og niðurlægingu. Sumar þeirra sem vitnað er til segja einnig að lögreglumenn hafi ýmist brugðist þeim eða jafnvel sjálfir tekið þátt í misnotkunni.
Lýstu grófu ofbeldi
Í ræðu sinni las Lowe upp fjölmargar frásagnir frá konum sem segjast hafa verið fórnarlömb kynferðislegrar misnotkunar á barnsaldri.
Ein kona lýsti því að glerflaska hefði verið brotin inni í henni þegar hún var aðeins 12 eða 13 ára gömul. Önnur sagði að misnotkunin hefði orðið sérstaklega mikil í kringum Eid hátíð múslima, þegar fleiri einstaklingar hefðu komið að ofbeldinu.
Þá sagði ein kona að hún teldi sig hafa verið nauðgað af 600 til 700 mismunandi körlum á þeim tíma sem misnotkunin stóð yfir.
Önnur lýsti því hvernig kristin trú hennar hefði verið notuð gegn henni.
„Þeir öskruðu: Hvar er Guð þinn núna? Hefur Guð yfirgefið þig?“ sagði hún samkvæmt vitnisburðinum.
Segja kynþátt og uppruna hafa skipt máli
Nokkrar konur sem vitnað var til sögðu að nær allar stúlkurnar sem þær kynntust í gegnum misnotkunina hefðu verið hvítar. Ein þeirra sagði að athugasemdir hefðu reglulega verið gerðar um að hvítar stúlkur væru minna virði en múslimskar stúlkur, þar sem þær síðarnefndu hefðu „almennilega siðferðiskennd.“
Lowe sagði að þessar frásagnir sýndu að kynþáttur og menningarlegir þættir hefðu gegnt hlutverki í sumum málanna.
Þessi afstaða til alvarleika brota vegna kynþáttar endurspeglaðist í réttarkerfinu, þar sem níðingar sem brutu á múslimskum stúlkum fengu þyngri dóma en þeir sem brutu á hvítum, vegna þess að „nú yrði erfiðara að finna mann handa þeim.“
Gagnrýnir yfirvöld harðlega
Í kjölfar ræðunnar gagnrýndi Lowe stjórnvöld, lögreglu og aðrar stofnanir fyrir að hafa að hans mati brugðist fórnarlömbum um árabil.
Hann hélt því fram að ótti við ásakanir um kynþáttafordóma eða íslamófóbíu hefði í sumum tilvikum orðið til þess að yfirvöld forðuðust að taka á vandanum af fullum þunga.
Umræðan um nauðgunargengin hefur verið umdeild í Bretlandi um árabil. Fjöldi rannsókna og opinberra skýrslna hefur staðfest að yfirvöld brugðust í mörgum tilvikum við að vernda börn sem urðu fyrir kynferðislegri misnotkun, meðal annars í borgum á borð við Rotherham, Rochdale og Telford.
I want the world to hear what we heard. pic.twitter.com/2DtCS0QztE
— Rupert Lowe MP (@RupertLowe10) June 1, 2026
