Pólsk-breskur sérfræðilæknir með áratuga reynslu af gjörgæslulækningum, alvarlegum áverkum (þar á meðal skot- og stungusárum) og vísindarannsóknum telur að háskólaneminn Henry Nowak hafi mögulega átt raunhæfa möguleika á að lifa af stunguárásina sem dró hann til dauða. Hann segir jafnframt að ekki sé hægt að útiloka að meðferð lögreglu á vettvangi hafi átt þátt í því hvernig fór.
Um er að ræða Dr. Krzysztof Magier, sem starfar sem sérfræðingur í barnalækningum í Bretlandi og hefur gegnt stjórnunarhlutverkum innan breska heilbrigðiskerfisins. Hann er með læknispróf, doktorsgráðu í læknisfræði og ber titilinn FRCPCH (Fellow of the Royal College of Paediatrics and Child Health), sem er viðurkenning sem veitt er reyndum sérfræðingum af breska Barnalæknafélaginu.
Magier hefur starfað sem yfirlæknir og sérfræðingur við bresk sjúkrahús, meðal annars á Isle of Wight, og komið að vísindarannsóknum sem birtar hafa verið í ritrýndum læknatímaritum. Hann hefur einnig reynslu af þjálfun í hernaðarlækningum og sérhæfðri meðferð alvarlegra áverka, þar á meðal skot- og stungusára.
Auk læknisstarfa sinna gegndi hann áður embætti heiðursræðismanns Póllands á Isle of Wight og var fyrsti og eini heiðursræðismaður Póllands á eyjunni. Hann hefur einnig tekið þátt í ýmsu samfélagsstarfi meðal Pólverja í Bretlandi og hlotið viðurkenningar frá pólskum yfirvöldum fyrir störf sín.
Segir upptökurnar sýna að hann hafi ekki verið dauðvona
Magier fór yfir bæði krufningarskýrslu og upptökur úr búkmyndavél lögreglu sem birtar voru eftir að morðingi Henrys, Vickrum Digwa, var dæmdur í lífstíðarfangelsi.
Blaðamaður er ekki læknisfræðimenntaður og ef eitthvað af eftirfarandi er rangt þýtt þá eru slíkar ábendingar vel þegnar.
Samkvæmt krufningarskýrslunni var meginorsök blóðmissis áverki á viðbeinsbláæð, stórri bláæð sem liggur undir viðbeininu.
Magier bendir á að yfirleitt sé minni þrýstingur í bláæðum en í slagæðum og að blæðing geti stundum minnkað tímabundið þegar líkaminn myndar blóðtappa á svæðinu sem hefur orðið fyrir skaða.
Að mati hans sýna upptökurnar að Henry hafi verið með meðvitund og getað talað skýrt þegar lögreglumenn komu á vettvang, líklega fimm til tíu mínútum eftir árásina.
„Hann var því ekki kominn á banvænt stig blóðmissis á þeim tímapunkti,“ segir Magier í umfjöllun sinni.
Telur meðferð lögreglu hafa getað aukið blæðinguna
Magier telur mögulegt að þegar lögreglumenn færðu handleggi Henrys aftur fyrir bak og handjárnuðu hann hafi það teygt á skaddaðri æð, rofið blóðtappa sem var farinn að myndast og valdið aukinni blæðingu.
Hann bendir á að Henry hafi misst meðvitund og látist örfáum mínútum síðar.
Að hans sögn er almennt varað við því að hreyfa eða rykkja einstaklingum ef grunur er á alvarlegum innvortis áverka þar sem slíkt geti raskað náttúrulegum blóðtöppum og leitt til stórfelldrar blæðingar.
„Það er mjög líklegt að meðferð lögreglunnar hafi átt þátt í dauða hans,“ segir hann.
Telur að sjúkraflutningafólk hefði getað bjargað honum
Magier gagnrýnir einnig að lögreglan hafi handjárnað Henry í stað þess að kalla strax á læknisaðstoð.
Hann telur að ef sjúkraflutningafólk hefði komið fyrr að meðferðinni hefði Henry átt raunhæfa möguleika á að lifa af. Hann nefnir meðal annars vökvagjöf í æð, lyf til að stöðva blæðingar og aðrar bráðaaðgerðir sem notaðar eru við alvarlegum áverkum.
Magier metur lífslíkur Henrys við slíkar aðstæður jafnvel allt að 50 prósent.
Hann bendir jafnframt á að vettvangurinn hafi verið í einungis nokkurra mínútna fjarlægð frá Southampton University Hospital, sem er sjúkrahús sem sérhæfir sig í að meðhöndla slíka áverka.
„Ég er sannfærður um að ef Henry hefði komist lifandi á sjúkrahúsið hefðu læknarnir bjargað honum,“ skrifar hann.
Magier segir að vegna þessa sé það hans mat að lögreglumenn beri töluverða ábyrgð á dauða Henry.
Opinber niðurstaða önnur
Niðurstöður Magiers eru þó ekki í samræmi við opinbera niðurstöðu málsins.
Réttarmeinafræðingur sem rannsakaði dauðsfallið komst að þeirri niðurstöðu að áverkarnir sem Henry hlaut hafi verið banvænir og að hann hefði ekki átt raunhæfa möguleika á að lifa af. Dómarinn sem fjallaði um málið tók undir það mat og taldi að meðferð lögreglu hefði ekki breytt endanlegri niðurstöðu.
Samkvæmt opinberri niðurstöðu var það stungusárið sjálft sem varð Henry Nowak að bana en ekki aðgerðir lögreglu.
After watching the police bodycam video, I disagree with the pathologist and the Judge’s opinion that Henry had no chance of survival.
Furthermore, there’s a high probability that the police intervention contributed to his death.
I have some idea because I’m a lead for pediatric…— Dr Krzysztof Magier 🇵🇱 (@DrMagier) June 3, 2026
