Hera Gísladóttir og Ásgeir Kolbeinsson hafa stúderað stjörnuspeki um nokkurra árabil og halda úti vinsælu stjörnuspekihlaðvarpi ásamt Gunnlaugi Guðmundssyni, einum reyndasta stjörnuspekingi landsins. Þau segja stjörnuspekina hafa opnað augu þeirra fyrir persónuleikaeinkennum fólks, bæði sínum eigin jafnt sem annarra, aukið skilning þeirra á orku, styrkleikum og hegðun, og hvernig nýta megi stjörnuspekina til að vera betri útgáfa af sjálfum sér.
Þau Hera og Ásgeir voru gestir Ásthildar Hannesdóttur í Dagmálum á dögunum þar sem þau ræddu stjörnuspeki og orkugreiningu í víðu samhengi.
Nýr vinkill í mannaráðningum
Stjörnuspeki er yfirleitt tengd sjálfsþekkingu og persónulegum áhugamálum en að sögn þeirra Heru og Ásgeirs eru dæmi um að íslensk fyrirtæki nýti sér stjörnuspeki og orkugreiningar við ráðningar á starfsfólki til þess eins að styrkja mannauðinn og hámarka árangur og ánægju í teymisvinnu.
„Það er einn stór fyrirtækjaaðili hérna á Íslandi sem notar þetta, ræður inn fólk algjörlega út frá stjörnuspeki og notar þetta bara til þess að styrkja teymið sitt,“ segir Ásgeir og er ekki í nokkrum vafa með slíkar ráðningar geti aukið ávinning fyrirtækja í flestum, ef ekki öllum, starfsgreinum.
Sumir passa illa inn
Lengi hafa atvinnurekendur stuðst við persónuleikapróf, hæfnimat og ýmis önnur greiningartæki við ráðningar á fólki. Hera og Ásgeir telja stjörnuspeki geta verið eitt slíkt verkfæri til að greina hvort einstaklingar séu í réttum hlutverkum innan fyrirtækja og teyma þar sem styrkleikar þeirra fá að njóta sín.
„Þú getur verið með fimm eða sex manna stjórnunarteymi og það er einhver einn þarna sem er að búa til ákveðna dýnamík í hópnum og er ólíkur,“ lýsir Ásgeir og segir slíkt ekki endilega neikvætt heldur að stundum sé fólk einfaldlega ekki á réttum stað eða fást við verkefni sem henti styrkleikum þeirra.
„Þá er í raun frábært að taka hann bara út og setja í eitthvað annað og breyta þessari hópuppsetningu. Þá ertu kominn með miklu betra samstarf. Þú getur verið að spara tíma, þú getur sparað orku og verið að gera svo miklu meira.“
Eldurinn skar sig úr
Hera tekur dæmi um fyrirtækjaheimsókn sem þau Gunnlaugur voru ráðin í til að skoða hópdýnamík á meðal sex starfsmanna. Þar hafi þau séð um leið að einn einstaklingur innan teymisins skar sig verulega úr með tilheyrandi áhrifum á hann sjálfan, samskiptin innan teymisins og árangur þess um leið.
„Við sáum alveg hvers konar fyrirtæki þetta var og hvers konar stjörnukort voru í rauninni að sækja í þetta starf. Þetta var svona jarðarstarf,“ segir Hera.
„Svo var einn einstaklingur þarna mikill eldur og við vorum bara: „Heyrðu, þessi manneskja er pottþétt sú sem er að kveikja í öllum hinum og passar ekki þarna inn“,“ útskýrir hún.
Þegar niðurstaðan var rædd við stjórnanda fyrirtækisins small allt saman og að sögn Heru höfðu þau Gunnlaugur haft á réttu að standa.
„Hann sagði bara: „Þetta er nákvæmlega manneskjan sem við erum búin að vera í vandræðum með í ár“,“ segir hún og bætir við að orkugreiningar á borð við þessa snúi síður en svo að því að útiloka ákveðna einstaklinga á vinnustöðum heldur snúist þær fyrst og fremst um það að skilja betur hvar hæfileikar hvers og eins kunni að nýtast sem best.
Leikritið verður þreytt
„Þetta snýst ekkert alltaf um: „Þú ert vondur og við ætlum að henda þér út.“ Þetta er bara það að þú ert ekki að vinna í þeirri orku sem þú ættir að vera að vinna í,“ lýsir Ásgeir og segir það geta haft mikil áhrif á sjálfsmynd einstaklinga þegar þeir upplifa ítrekað að þeir passi ekki inn í starfsumhverfi sitt. Þá geti það einnig stuðlað að veikindum og jafnvel kulnun fólks í starfi.
„Það er svona okkar sýn í rauninni á veikindi og kulnun yfirhöfuð að það er eitthvað að orkukerfinu í þér,“ segir Ásgeir og Hera tekur undir:
„Ég segi alltaf að þú sjálf ert orðin þreytt á að leika þetta leikrit sem þú ert búin að vera leika,“ segir hún stendur fast á þeirri skoðun að í raun geti kulnun stafað af hinu jákvæða þó svo að almennt sé litið á fyrirbærið neikvæðum augum.
„Kulnun er jákvæð. Ég vil breyta þessu orðalagi. Það er í rauninni þannig að þú ert með þetta dásamlega hylki sem er að láta þig vita af því að þetta er komið gott. Hættu. Sumir þurfa að klessa á vegg á meðan aðrir fá að fatta það fyrr.“
Smelltu á hlekkinn hér að neðan til að nálgast viðtalið við Heru og Ásgeir í heild sinni.
