Um sex hundruð sendlar starfa hjá Wolt hér á landi.
Hópur þeirra lagði niður störf um miðjan september þegar laun þeirra voru lækkuð um allt að 40 prósent án skýringa, að þeirra sögn.
Forsvarsmenn Wolt boðuðu sendlana á sinn fund þar sem þeim var tjáð að tæknileg vandamál væru ástæða launalækkunarinnar.
Sendlarnir funduðu í húsnæði Eflingar í dag.
Segja ekkert hafa breyst frá fundi með forsvarsmönnum Wolt
Gheorghe Mihai Cacaliceanu er talsmaður sendla Wolt á Íslandi.
Hann segir að hópur sendla hafi fundað með forsvarsmönnum Wolt á Íslandi 24.september.
Gheorghe segir niðurstöðu fundarins hafa verið að kjör sendla yrðu rétt við á næstu fjórum til sex vikum en það hafi ekki staðist.
Hann segir sendla enn fá sömu lágu launin og þess vegna hafi verið ákveðið að boða til fundar í húsnæði Eflingar í dag.
Georghe útilokar ekki að sendlarnir leggi brátt aftur niður störf.
Segja vinnusamband byggt á gerviverktöku
Sendlarnir segja að vinnusamband þeirra við Wolt sé byggt á gerviverktöku en því hafa forsvarsmenn Wolt hafnað.
Miðstjórn ASÍ hefur lýst yfir stuðningi við kjarabaráttu sendlanna og Efling hefur verið þeim innan handar.
Sólveig Anna Jónsdóttir, formaður Eflingar, segist vilja sýna sendlunum stuðning.
„Þetta gerum við auðvitað bara til að sýna samstöðu með þeim en líka vegna þess að við lítum á módel Wolt og hvernig þau starfa sem aðför að réttindum alls verkafólks á þessu landi. “
Í gerviverktöku nýtir atvinnurekandi sér slæma samningsstöðu og réttleysi starfsfólks.
Sólveig Anna segir það því miður of algengt að jaðarsettir hópar samfélagsins þurfi að sætta sig við slæmar aðstæður á vinnumarkaði.
„Því miður er oft, sökum jaðarsetningar fólks, sökum þess að þau tala ekki íslensku og eru oft í þröngri stöðu, til einstaklingar hér á landi, fyrirtæki, sem ganga á lagið og einmitt eru tilbúin til þess að koma fram við fólk með ótrúlega ömurlegum hætti. Sýna því framkomu sem aldrei myndi ganga í samskiptum við íslenska millistétt, þetta er alveg á hreinu.“
