Svör bárust ekki frá Samfylkingu og Vinstrinu á meðan eina framboðið sem lýsti yfir fullum stuðningi við nýja staðsetningu kaffistofunnar voru Sósíalistar.
Framboð sem hópurinn túlkar jákvæð gagnvart endurskoðun staðsetningar eru Sjálfstæðisflokkur, Miðflokkur, Framsókn og Viðreisn. Svör þeirra framboða sem ekki náðu kjöri í borgarstjórn verða hér undanskilin til einföldunar.
Afdráttarlausust eru svör Sjálfstæðisflokks og Miðflokks. Sjálfstæðisflokkurinn vill „með virkum hætti aðstoða Samhjálp við að finna annað húsnæði á betri stað“ og Miðflokkurinn vill finna kaffistofunni „húsnæði við hæfi á heppilegum stað í borginni“ og að borgin styðji fjárhagslega við rekstur hennar.
„Við erum að setja pressu á að málið verði tekið upp aftur í umhverfis- og skipulagsnefnd. Á sama tíma gerum við okkur grein fyrir því að þau eru nýbyrjuð að starfa,“ segir Íris Hrund Sigurðardóttir sem er í forsvari fyrir íbúahópinn.
Þeir flokkar sem nú mynda meirihluta voru gagnrýnir á meðferð málsins í umhverfis- og skipulagsnefnd á sínum tíma. „Þessir flokkar sem eru núna í meirihluta sendu okkur, þegar þeir voru í kosningabaráttu, yfirlýsingu um að þeir myndu með virkum hætti bregðast við þessum ágreiningi,“ segir Íris.
Kæran enn í meðferð hjá úrskurðarnefnd
Samkvæmt upplýsingum sem kærendur hafa fengið má
Í tilkynningu sem íbúahópurinn sendi frá sér segir að þau búist við niðurstöðu úrskurðarnefndarinnar um miðjan júní. Óvissa sé þó meðal þeirra um hvort kaffistofan hafi þá þegar hafið starfsemi.
„Við höfum bent á, meðal annars í kærunum, að þessi ákvörðun er röng. Samkvæmt lögum er þetta óheimil starfsemi í þessum hverfiskjarna. Þetta er úrskurðarnefndin með til úrskurðar hjá sér, sem við erum alveg ágætlega bjartsýn á að fari okkur í vil en maður veit aldrei,“ segir Íris um óvissu íbúanna. Þá auki enn á óvissuna hve sértæk starfsemi Kaffistofu Samhjálpar sé og því sé skortur á fordæmum við úrvinnslu kæranna.
Endurupptaka ákvörðunarinnar væri farsælasta lausnin
„Farsælasta lausnin fyrir okkur, íbúana, er að þessi stjórnvaldsákvörðun sem tekin var hjá borginni á sínum tíma verði hreinlega endurupptekin og þau komist að annarri niðurstöðu. Samkvæmt lögum hafa þau enn þá heimild til þess, þau hafa þrjá mánuði til að taka stjórnvaldsákvörðun upp aftur. Eftir þessa þrjá mánuði hafa þau enn þá heimild til að afturkalla hana en það telst þá meira íþyngjandi.“
Safna undirskriftum á Ísland.is
Yfir sjö hundruð einstaklingar hafa skrifað undir formlega áskorun á Ísland.is þar sem þess er krafist að borgin endurskoði staðsetninguna. Við að fletta tíu efstu nöfnunum á undirskriftalistanum (þegar þetta er skrifað) upp í símaskránni virðist sem þau séu öll með skráð heimilisfang í nágrenni við Grensásveg.
Íris segir íbúasamtökin vilja koma á framfæri hve erfitt verði að snúa við ákvörðuninni eftir að kaffistofan tekur til starfa. Þá hafi þetta áhrif á ótal margt, en þó helst þá miklu öryggistilfinningu sem fólk í hverfinu upplifi.
„Við höfum bara upplýsingar frá lögreglu um fjölda útkalla og tegund brota sem eiga sér stað í kringum Kaffistofu Samhjálpar. Þetta er þannig að lögregla kemur að meðaltali annan hvern dag. Það eru grunnskólar beggja megin kaffistofunnar: í tvö til þrjú hundruð metra fjarlægð eru sex hundruð börn í skóla. Það er leiksvæði við Grensásveg, það búa meira að segja börn í sama húsi. Það er verið að setja þetta inn í miðjuna á íbúahverfi, bókstaflega.“
„Við erum hrædd um börnin okkar, eignirnar okkar, friðhelgi… Við erum ógeðslega hrædd.“
