Páll Vilhjálmsson skrifar:

Daginn fyrir þjóðaratkvæðagreiðsluna á höfuðdaginn birti RÚV frétt um að íslensk sjávarútvegsfyrirtæki og samtök þeirra stæðu að baki herferð fyrir nei-í í kosningunni um ESB-umsókn. Sömu aðilar hafi veitt fjármagni til Brexit-kosninganna fyrir tíu árum, er Bretland sagði sig úr ESB.  Þingmaður Miðflokksins, Sigríður Andersen, telur ástæðu til að alþingi rannsaki fréttaflutning RÚV.

RÚV notar sem skálkaskjól frétt hollensks jaðarmiðils, Follow the money, en prjónar við röngum upplýsingum, t.d. að Samtök sjávarútvegsins hafi lýst sig mótfallin ESB-aðild Íslands. Í leiðréttri RÚV-frétt var staðhæfingin dregin tilbaka, þrem klukkustundum eftir upphaflega birtingu. Aðferðafræði RÚV er að birta rangfréttir og draga ekki tilbaka fyrr en einhver mótmælir. En þá er skaðinn skeður. Eins og til var ætlast.

Megináhersla RÚV-fréttarinnar er að tengja Brexit við atkvæðagreiðsluna um ESB-umsókn Íslands. Þorgerður Katrín utanríkisráðherra og aðaltalsmaður já-hreyfingarinnar lagði í upphafi kosningabaráttunnar áherslu á samlíkinguna við Brexit. Þegar í mars, rétt eftir að hafa kynnt fyrirhugaða þjóðaratkvæðagreiðslu, var Þorgerður Katrín í viðtali við Euronews. Fyrirsögnin á viðtalinu:

Ísland óttast Brexit-líkar lygar í þjóðaratkvæðagreiðslu, segir utanríkisráðherra

Allan þann tíma sem kosningabaráttan stóð yfir, um já við ESB eða nei, var reglulega minnt á þessa kenningu Þorgerðar Katrínar sem var sett fram áður en alþingi samþykkti að efnt skyldi til þjóðaratkvæðagreiðslunnar. Brexit-samlíkingin var snar þáttur í kosningabaráttu já-hreyfingarinnar.

Frétt RÚV daginn fyrir kjördag var hugsuð að keyra þann áróðurspunkt heim að útgerðarauðvaldið á Íslandi vildi nei. Sama auðvaldið og styrkti Brexit, samkvæmt samsæriskenningu utanríkisráðherra og RÚV.

RÚV hefur áður leikið þann leik að planta fréttum í erlenda fjölmiðla og birta endursögn hér heima með útlensku lögmæti. Berlingske í Danmörku var moldvarpa RÚV í fréttaaðför að Páli skipstjóra Steingrímssyni. Aðgerðafréttamennska er viðurkennd iðngrein á Efstaleiti.

Ekki aðeins í fréttum heldur í umræðuþáttum reyndi RÚV að auka fylgið við já-hreyfinguna. Tveim dögum fyrir kosningar stillti RÚV upp Kristrúnu forsætisráðherra við hlið talsmanna Evrópuhreyfingarinnar og Já-til-að-sjá í umræðuþætti. Kristrún hafði farið með veggjum í kosningabaráttunni, efnt til hlustunarfunda og dregið lappirnar í stuðningi við þjóðaratkvæði í þágu Viðreisnar. En tveim dögum fyrir kjördag límdi RÚV forsætisráðherra við já-liðið með uppstilltum umræðuþætti. Allt kom fyrir ekki. Þjóðin sagði nei.

Sigríður Andersen þingmaður Miðflokksins ræddi í Þjóðmálum fréttaflutning RÚV í aðdraganda kosninganna síðasta laugardag. DV endursegir orð þingmannsins. Sigríður telur fulla ástæðu til að stjórnskipunar- og eftirlitsnefnd alþingis taki til athugunar fréttaflutning í aðdraganda þess að þjóðin greiddi atkvæði um ESB-umsókn. Fyrir hjá stjórnskipunar- og eftirlitsnefnd er aðkoma RÚV að byrlunar- og símamálinu.

RÚV er allsráðandi í sjónvarpsfréttum hér á landi. Efstaleiti fær árlega yfir sex milljarða króna af almannafé til að stunda faglega og hlutlæga fjölmiðlun. Misbrestir á fagmennsku ríkismiðilsins í fréttaumfjöllun eru slíkir að innri rannsókn stendur yfir. Tímabært er að þjóðin fái opinbera innsýn í ormagryfjuna á Efstaleiti. Alþingi stendur frammi fyrir verkefni sem þolir ekki bið. Eftir fall Sýnar/Stöðvar 2 á þjóðin engan valkost við RÚV-sjónvarpið. Böndum þarf að koma á ríkisreknu áróðursmiðstöðina á Efstaleiti.