Argentínsk stjórnvöld boða að viðurlög og refsingar bíði þeirra olíufélaga sem starfa í leyfisleysi nærri Falklandseyjum eftir að Javier Milei forseti sagði í sjónvarpsávarpi vinda breytinga blása þannig að landið geti gert kröfu til eyjaklasans.
Forsetaskrifstofan sagðist í yfirlýsingu á föstudag hafa fyrirskipað rannsókn á starfsemi 45 fyrirtækja tengdum rannsóknum og vinnslu jarðefna við Falklandseyjar. Þau voru ekki nafngreind en argentínskir miðlar segja bandarísk, kanadísk, ísraelsk, dönsk, hollensk og bresk fyrirtæki á lista stjórnvalda.
Argentínumenn og Bretar háðu mannskætt tíu vikna stríð um yfirráð yfir eyjunum árið 1982 með sigri þeirra síðarnefndu. Milei flutti ávarp á fimmtudag þar sem hann endurnýjaði landakröfur Argentínu og hótaði olíufyrirtækjum refsiaðgerðum.
Í gær sendu þrjú olíuþjónustufyrirtæki frá sér yfirlýsingar um að þau vinni ekki og muni ekki vinna að verkefnum í nágrenni Falklandseyja. Milei deildi síðar á samfélagsmiðlinum X fréttum af ummælunum með skammstöðun sem þýðir að allt gangi samkvæmt áætlun.
Trump-stjórnin hefur hótað að vefengja fullveldisrétt Breta yfir Falklandseyjum nema þeir auki framlög sín til Atlantshafsbandalagsins.
Breski varnarmálaráðherrann Wes Streeting brást við með því að segja skuldbindingar við eyjarskeggja óhagganlegar og þeir hefðu sjálfir ákveðið í þjóðaratkvæðagreiðslu að vera hluti Bretlands.
Árið 2013 greiddu 99,8 prósent íbúa atkvæði í þjóðaratkvæðagreiðslu um að eyjarnar yrðu áfram breskt handanhafssvæði með eigin ríkisstjórn og löggjafarþing. Bretland ber ábyrgð á utanríkisstefnu og varnarmálum auk þess að skipa landsstjóra sem er fulltrúi krúnunnar á eyjunum. Íbúarnir eru fullgildir breskir ríkisborgarar.
