Ursula von der Leyen, forseti framkvæmdastjórnar Evrópusambandsins, kemur til Grænlands í dag og á morgun verður undirritaður nýr samstarfssamningur milli sambandsins og grænlensku heimastjórnarinnar.
Tveggja daga heimsókn von der Leyen er ætlað að staðfesta þann stuðning Evrópusambandsins sem hún hét Grænlendingum í janúar í skugga ásælni Donalds Trump Bandaríkjaforseta.
Þetta er í annað sinn á tveimur árum sem hún sækir landið heim, þótt það sé ekki hluti Evrópusambandsins.
The Financial Times staðhæfir að von der Leyen ætli að bjóða Grænlendingum tvö hundruð milljóna evra stuðning til viðbótar þeim 530 milljónum sem boðaðar eru á fjárhagstímabilinu 2028 til 2034, sem jafnframt er tvöföldun á fyrra framlagi.
Grænland verður sífellt mikilvægara Evrópusambandinu vegna dýrra hráefna í jörðu, af öryggisástæðum og sem hlið að Norðurslóðum að mati Marc Jacobsen, rannsakanda við Konunglega danska varnarmálaskólann.
Þótt sambandið geti ekki veitt hernaðarstuðning sé Grænlendingum mikils virði að finna að þeir standi ekki einir. Síðan Trump tók að ásælast Grænland vegna mikilvægis þess fyrir þjóðaröryggi Bandaríkjanna hafa fulltrúar þaðan rætt um leiðir til samvinnu við grænlenska og danska ráðamenn.
Hann hefur ekki verið jafn hávær varðandi Grænland síðan Jeff Landry, sérlegur erindreki hans, fór þangað í maí. Hann virðist þó ekki af baki dottinn og staðhæfir að Danir hunsi öryggi Grænlands. Danska ríkisstjórnin hefur aukið framlög til varna landsins og Atlantshafsbandalagið líka.
Heimsókn von der Leyen hefst á sama tíma og Arctic Shield-heræfingar tíu ríkja Atlantshafsbandalagsins, sem greinendur segja ekki hreina tilviljun. Hún hyggst í heimsókninni ræða við formann landsstjórnarinnar Jens-Frederik Nielsen, danska forsætisráðherrann Mette Frederiksen og leiðtoga færeysku stjórnarinnar.
