Ákæra var í dag gefin út á hendur James Comey, fyrrverandi forstjóri alríkislögreglunnar FBI í Bandaríkjunum, fyrir færslu sem hann birti á samfélagsmiðlum fyrir um ári síðan.
Þetta er önnur ákæran á hendur Comey en fyrri ákærunni var vísað frá á síðasta ári eftir að skipun Lindsey Halligan sem bráðabirgðasaksóknara í málinu var dæmd ólögmæt.
Ákæran er talin tilkomin vegna þrýstings sem Donald Trump forseti Bandaríkjanna hefur sett á dómsmálaráðuneytið að gefa út ákærur gegn pólitískum óvinum hans.
Færsluna birti Comey á samfélagsmiðlinum Instagram og var hún ljósmynd af skeljum sem búið var að raða þannig að þær mynduðu tölurnar 86 og 47.
Talan 86 er stundum notuð í slangri í Bandaríkjunum til þess að merkja að útskúfa eigi einhverjum en talan hefur einnig verið notuð í götumáli yfir manndráp. Talan 47 táknar svo Trump þar sem hann er 47. forseti Bandaríkjanna.
Comey eyddi færslunni stuttu eftir að hann birti hana og sagði að hann hefði birt hana þar sem hann hefði talið að lesa mætti pólitísk skilaboð úr skeljunum. Hann kvaðst þó ekki hafa haft hugmynd um að lesa mætti ofbeldisfulla merkingu úr myndinni.
Í umfjöllun The New York Times um málið kemur fram að stofnunin sem sér um að gæta lífs forsetans (Secret service) hafi í kjölfarið fylgst með ferðum Comey og konu hans sem voru á þessum tíma í fríi í Virginíu-fylki.
Útsendarar ræddu við Comey eftir að færslan var birt og sagði Comey þá að hann hefði ekki haft í hyggju að skaða Trump. Málið var þá látið niður falla en hefur nú verið tekið upp aftur með nýju ákærunni.
