Erlingur Erlingsson hernaðarsagnfræðingur var gestur Boga Ágústssonar í Heimsglugganum á Morgunvaktinni á Rás 1. Þeir ræddu meðal annars nýlokinn leiðtogafund G7-ríkjanna í Evian í Frakklandi. Þar var eindregnum stuðningi lýst við Úkraínu í vörn þeirra gegn innrásarher Rússa. Erlingur telur óheppilegt ef vopnahléssamkomulag Bandaríkjanna og Írans verði kennt við Versali í ljósi þess að friðarsamningarnir eftir fyrri heimsstyrjöld voru gerðir þar og eru af mörgum taldir ein af meginástæðum fyrir seinni heimsstyrjöldinni. Erlingur og Bogi ræddu strategíska stöðu Bandaríkjanna og Írans. Margir fréttaskýrendur telja að þrátt fyrir hernaðarlega yfirburði hafi Bandaríkin beðið strategískan ósigur og staða klerkastjórnarinnar á Íran sé á margan hátt sterkari en áður en Bandaríkin og Ísraelsmenn hófu árásir á Íran í febrúarlok í ár. Þá var rætt um aukakosningarnar til breska þingsins í dag þar sem Andy Burnham reynir að komast á þing þar sem hann hyggst reyna að velta Keir Starmer úr sessi sem leiðtogi Verkamannaflokksins og forsætisráðherra.
G7 leiðtogafundur í Evian
Leiðtogafundi G7-ríkjanna lauk í gær en hann var haldinn í Evian við Genfarvatn í Frakklandi. Leiðtogarnir samþykktu aukinn hernaðarstuðning við Úkraínu og refsiaðgerðir gegn Rússlandi á fundinum. Donald Trump forseti Bandaríkjanna sat fundinn til enda en hefur tvisvar áður yfirgefið slíkan fund áður en honum lauk. Leiðtogarnir lýstu almennri ánægju með niðurstöður fundarins. Trump sagði fundinn „stórkostlega árangursríkan“.
Úkraínuforseti sérstakur gestur
Volodymyr Zelensky, forseti Úkraínu, var gestur á fundinum og Erlingur Erlingsson segir fundinn árángursríkan fyrir Úkraínu og yfirlýsingin um stuðning við landið hafi verið góð. Ríkin hafi skuldbundið sig til að senda frekari loftvarnarflaugar sem sárvanti og einnig lofað að hjálpa til við að verja og gera við orkuinnviði og hjálpa Úkraínu í gegnum næsta vetur. Einnig séu það góð tíðindi að leiðtogarnir hafi sammælst um að refsiaðgerðir gegn Rússum verði hertar.
Macron var ánægður með árangur fundarins
Emmanuel Macron Frakklandsforseti, sem var gestgjafinn á fundinum, sagði að honum loknum að hann væri ánægður. Fundurinn hefði óumdeilanlega gengið vel. Friedrich Merz, kanslari Þýskalands, sagði samstöðuna með Úkraínu sjaldan hafa verið jafn mikla og Rússar hefðu fengið skýr skilaboð um auking þrýsting og hertar refsiaðgerðir,
Úkraínu gengur betur í stríðinu gegn Rússum
Erlingur nefnir að Úkraínuher gangi nú betur í vörn á vígvöllunum, þeir hafi náð forskoti í drónatækni, vorsókn Rússa hafi að engu orðið og mannfall þeirra aukist mikið, Úkraínumenn geti gert árásir tugi kílómetra fyrir aftan víglínuna á birgðaflutninga, stjórnstöðvar og flugvelli. Þetta geri Rússum erfitt fyrir. Að auki valdi langdrægar árásir Úkraínumanna miklu tjóni á olíu- og gasiðnaði Rússa. Þetta hækki sársaukastig Rússa og geri Pútín Rússlandsforseta erfiðara að halda stríðinu áfram.
„Trump tapaði þessu stríði"
Fyrirsögn leiðara New York Times 17. júní 2026 er að Trump Bandaríkjaforseti hafi tapað stríðinu við Íran. Eftir fjögurra mánaða átök standi Bandaríkin strategískt veikari en Íran sé sterkara. Erlingur segir að Íranar hafi nú ás í erminni um ókomna framtíð; að geta lokað Hormús-sundi. Þeir hafi hingað til í fyrri deilum ekki viljað loka sundinu. Digurbarkalegar yfirlýsingar Trumps um að stríðsmarkmið sé að skipta eigi um stjórnvöld og skilyrðislausa uppgjöf hafi sett Írana upp við vegg og þá hafi þeir ekki hikað við að beita þessu örþrifaráði að loka Horúms-sundi. Erlingur segir enn fremur að Trump hafi tryggt í sessi harðlínustjórn byltingarvarðarins.
Örlagaríkar aukakosningar til breska þingsins
Aukakosningar eru í Makersfield-kjördæminu sem er á milli Manchester og Liverpool í dag. Andy Burnham, borgarstjóri Manchester, er í framboði fyrir Verkamannaflokkinn. Fréttaskýrendur segja að takist honum að vinna reyni hann að velta Keir Starmer úr leiðtogaembættinu í Verkamannaflokknum. Erlingur Erlingsson segir rúmlega helmingsíkur á að Burnham sigri í kosningunum. Hann segir Burnham farsælan borgarstjóra í Manchester þó að hann sé frá Liverpool og það segir mikið um þokka hans.
Staða Keir Starmers er erfið
Erlingur segir að Keir Starmer, leiðtogi Verkamannaflokksins og forsætisráðherra, sé í klemmu vegna þess að efnahagsstaða Bretlands sé gríðarlega erfið og það megi rekja allt aftur til Brexit-sjálfsmarksins. Menn hafi ekki náð því sem þeir vildu með Brexit og efnahagslegt tjón hafi orðið mjög mikið. Erlingur segir bresk stjórnmál hafa mest minnt á snúningshurð þar sem sífellt er verið að skipta um forsætisráðherra
