Hákon áttundi sór í morgun eið sem næsti Noregskonungur. Þar með hefur hann formlega tekið við völdum af föður sínum, Haraldi, sem lést á föstudag. Athöfnin var í norska Stórþinginu og henni stjórnaði forseti þingsins.
Þingforsetinn minntist Haraldar og sagði hann hafa verið tákn alls þess besta í Noregi. Ingiríður Alexandra, dóttir konungshjónanna sem er 22 ára, er formlega orðin krónprinsessa.
Við athöfnina lofaði Hákon að stjórna Noregi í samræmi við stjórnarskrá og lög. Hákon var ekki krýndur formlega með kórónu. Kórónan er nú við kistu Haraldar. Sú hefð að krýna nýjan konung var lögð niður eftir að langafi Hákonar og nafni var krýndur 1905. Stuttu eftir það voru ákvæði um krýningarathöfn tekin úr stjórnarskránni.
Hér má sjá svipmyndir frá athöfninni í morgun:
Mannfjöldi safnaðist saman við þingið í morgun og fylgdist með athöfninni á skjám sem þar hafði verið komið fyrir. Þá var athöfninni einnig sjónvarpað. Nýja konunginum var vel fagnað að athöfn lokinni. Fólk hafði komið sér fyrir við veginn sem ekið var með hann burt frá þinginu.
Mette-Marit drottning átti ekki heimangengt í morgun. Hún var með lungnasjúkdóm og ný lungu voru grædd í hana í júní. Síðan þá hefur hún fengið fylgikvilla. Hún fann fyrir þeim í morgun og var því undir eftirliti lækna. Í fylgd Hákonar í morgun voru börnin hans Ingiríður Alexandra krónprinsessa og Sverrir Magnús prins og móðir konungsins, Sonja drottning.
