„Ég var nú eiginlega bara mjög hissa,“ segir Jón Gnarr, fyrrum þingmaður Viðreisnar, um ummæli Gríms Grímssonar, þingmanns Viðreisnar. Grímur sagði í vikulokunum í dag að þingnefnd um málefni barna með fjölþættar stuðningsþarfir, sem Jón fór fyrir, hefði ekki komið saman undanfarna mánuði.
„Þessi nefnd var skipuð til eins árs formlega í júní 2025 þannig að starfstíma nefndarinnar lauk fyrir fimm mánuðum, sem ætti nú alveg að skýra af hverju nefndin hefur ekki verið að koma saman,“ segir Jón.
„Það sem er líka sérstakt í þessu er að Grímur átti sjálfur sæti í nefndinni,“ segir Jón sem tekur fram að nefndin hafi verið stofnuð að hans frumkvæði í samstarfi við Ásthildi Lóu Þórsdóttir, þáverandi mennta- og barnamálaráðherra. Sjálfur hefur Jón áður sagt að málefni barna hafi verið honum ofarlega í huga þegar hann bauð sig fram sem þingmaður.
Þegar nefndin tók til starfa hafi Ásthildur þó verið búin að segja af sér. „Það var kominn nýr ráðherra í ráðuneytið og það skapaði ákveðna erfiðleika auðvitað,“ segir Jón en Guðmundur Ingi Kristinsson tók við af Ásthildi Lóu.
Ekki stemning fyrir þverpólitísku starfi eftir veiðigjaldið
Varðandi fundina segir Jón að Grímur hafi verið boðaður á alla fundi nefndarinnar. Þeir hafi hins vegar ekki gengið upp þar sem oft hafi ekki verið nægjanlega margir til þess að halda formlega fundi.
„Það var draumur minn að við gætum haft svona þverpólitíska nefnd um þennan málaflokk og reynt að komast að einhverjum umbótum í sameiningu og kannski var það óraunhæft af mér en mér fannst það samt tilraunarinnar virði,“ segir Jón sem tekur einnig fram að ekki hafi verið greidd laun fyrir sæti í nefndinni.
„Þetta var bara ákveðin tilraun til að reyna að koma góðu áleiðis og hún gekk ekki upp,“ segir Jón. Nefndin hafi komið til strax eftir umræður um veiðigjaldið og telur Jón að ekki hafi verið mikill áhugi fyrir þverpólitísku starfi.
„Það var svolítið súr pólitísk stemning,“ segir hann. Þá hafi ástandið í ráðuneytinu verið með þeim hætti að Jón taldi tilraunina fullreynda og því hafi verið kominn tími til að skoða aðra hluti.
Ummæli Gríms árás á hans persónu
Samflokksmenn Jóns hafa brugðist við úrsögn hans síðustu daga og segir Jón að hann hafi vissulega verið undir það búinn að fólk myndi vilja tjá sig um hana.
„Ég hef aðeins verið að skoða viðbrögð og mér fannst þetta hjá Grími falla undir það sem kallast nú gjarnan „character attack“,“ segir hann.
Nokkuð hefur verið rætt um ummæli Jóns í Spursmálum á mbl.is þar sem Stefán Einar Stefánsson bar undir Jón hvort köldu andaði á milli Þorbjargar Sigríðar Gunnlaugsdóttur dómsmálaráðherra og Þorgerðar Katrínar Gunnarsdóttur utanríkisráðherra. Þorbjörg sagði þetta af og frá í viðtali við vísir.is í dag.
„Ég get ekki sagt ósatt um það, ég hef heyrt það,“ segir Jón „Hvað þetta er veit ég ekkert, en ég játa að ég hef orðið var við þetta,“
