Norræna blaðamannasambandið (NJF) lýsir þungum áhyggjum af stöðu blaðamennsku og fréttamiðla á Íslandi.
Í yfirlýsingunni frá sambandinu segir að um áratugaskeið hafi Ísland verið meðal fremstu ríkja í fjölmiðlafrelsi, stöðu sem byggði á sterkri vernd tjáningarfrelsis og skilningi á grundvallarhlutverki sjálfstæðra, ritstýrðra fjölmiðla.
„Nú eru hins vegar vaxandi áhyggjur af því hvort nægilega góðar forsendur séu fyrir sjálfstæðri blaðamennsku til framtíðar hér á landi,“ segir í yfirlýsingu NJF.
Þar segir að rekstrarumhverfi fjölmiðla hafi farið versnandi á undanförnum árum því auglýsingatekjur rati í auknum mæli til erlendra tæknirisa. Þá geri smæð íslenska fjölmiðlamarkaðarins hann sérstaklega viðkvæman fyrir efnahagslegum og tæknilegum breytingum.
Það hafi sýnt sig þegar Sýn ákvað að leggja niður sjónvarpsfréttir og nú sé aðeins einn íslenskur fjölmiðill sem sendi út sjónvarpsfréttir. Þá sé aðeins einn íslenskur fjölmiðill sem gefur út prentað dagblað.
Í yfirlýsingunni segir að á hinum Norðurlöndunum séu áskriftir mikilvægur þáttur í að skapa fjárhagslegan grundvöll fyrir faglega blaðamennsku. Á Íslandi þurfi að styrkja þann grunn með stuðningi stjórnvalda, fjölmiðlafyrirtækja og almennings.
Blaðamennska sé lykilþáttur í lýðræðislegum viðnámsþrótti samfélaga. Fábreyttara og veikara fjölmiðlaumhverfi berskjaldi samfélög á tímum aukinnar upplýsingaóreiðu og uppgangs gervigreindar.
„NJF stendur með blaðamönnum á Íslandi og Blaðamannafélagi Íslands í baráttu þeirra fyrir sterkara fjölmiðlaumhverfi og blaðamennsku á Íslandi. Við hvetjum íslensk stjórnvöld, stjórnmálafólk, eigendur fjölmiðla, atvinnulífið og aðra hagaðila til að grípa til aðgerða til að standa vörð um sjálfstæða blaðamennsku.“
