Ungmennanna þriggja, sem létust í bílslysi á Krýsuvíkurvegi aðfaranótt mánudags, var minnst á bænastundum í Háteigskirkju og Lágafellskirkju síðdegis. Helga Soffía Konráðsdóttir, sóknarprestur í Háteigskirkju, segir marga eiga um sárt að binda. Slys eins og þetta hafi gríðarleg áhrif á allt samfélagið.
„Og nú í septemberbyrjun þegar skólarnir eru að byrja, lífið einhvern veginn að taka við sér og allt er svo lofandi og gott, þá er okkur kippt niður á jörðina og minnt á hvað lífið er fallvalt.“
Mikilvægt að hlusta á ungt fólk í sorg
Slysið snertir mörg ungmenni og áfallið getur kippt jörðinni undan fótum þeirra sem glíma við afleiðingarnar. Helga Soffía segir mikilvægt að taka utan um unga fólkið – hlusta á það og gefa sér tíma í spjall.
„Það sem krakkarnir gera líka, sem er gott fyrir okkur fullorðna fólkið, er að þau standa mjög vel saman og styðja hvert annað. Þau eiga að halda áfram að gera það en þau þurfa að hafa aðgengi að fullorðnu fólki til að tala við og vera ekki ein með sorg sína,“ segir Helga Soffía.
Hún biður ungt fólk að vera ekki óttaslegið. „Mig langar svo að biðja alla unglinga að staldra við og taka lífinu með ró. Vera til staðar, lifa lífinu hægt og njóta þess að vera til. Ekki vera óttaslegin og hrædd, farið og finnið einhvern að tala við.“
Hún segir að þegar áföll ríði yfir lítið samfélag, eins og okkar, sameinist fólk í sorg og samkennd.
„Og við tökum það mjög nærri okkur þegar ungt fólk í blóma lífsins kveður á snöggu augabragði í slysi. Það snertir alla og varðar alla.“
