Blómsveigur var lagður að leiði Bríetar Bjarnhéðinsdóttur, einnar áhrifamestu kvenréttindakonu Íslands, í tilefni kvenréttindadagsins en 111 ár eru nú liðin frá því að konur fengu kosningarétt og kjörgengi til Alþingis.
Þó að þessi réttindi þyki sjálfsögð í dag voru þau ekki sjálfgefin og eiga sér langan aðdraganda. Hollt er að rifja upp sögu þeirra af virðingu við þær konur sem ruddu brautina.
Skýr vilji íslenskra kvenna
Þegar Alþingi var endurreist í núverandi mynd í Reykjavík árið 1845 höfðu íslenskar konur hvorki kosningarétt né kjörgengi.
Hið íslenska kvenfélag, sem stofnað var árið 1894 með það að markmiði að auka réttindi kvenna á Íslandi, stóð þá fyrir nokkrum undirskriftasöfnunum um land allt á nokkurra ára tímabili og skoraði þannig ítrekað á Alþingi að breyta stjórnskipunarlögum og veita konum einnig kosningarétt og rétt til kjörgengis.
Undirskriftarlistar kvenfélagsins voru afhentir Alþingi árin 1895, 1907 og 1913. Þess má til gamans geta að árið 1907 söfnuðust undirskriftir rúmlega 12 þúsund kvenna sem þá var rúmur helmingur allra kvenna á kosningaaldri á landinu, þ.e. 25 ára og eldri.
Sást til sólar
Þann 19. júní 1915 undirritaði Kristján X. konungur loks lög um breytingu á stjórnarskrá Íslands sem meðal annars færðu konum 40 ára og eldri kosningarétt til Alþingis og skyldi það aldurstakmark lækka um eitt ár næstu 15 árin.
Bríet Bjarnhéðinsdóttir, sú mikla baráttukona, tjáði sig um 40 ára aldurstakmarkið í Kvennablaðinu það sama ár og kallaði það „hinn nafnfræga íslenzka, stjórnvizkulega búhnykk, að veita ekki konum fullan kosningarrétt, heldur smá skammta þeim hann úr hnefa í 15 ár.“
Aldurstakmarkið umdeilda vék svo þegar ný stjórnarskrá tók gildi árið 1920 og varð þá fullt jafnræði með konum og körlum.
141 kona tekið sæti á Alþingi
Þremur árum seinna tók Ingibjörg H. Bjarnason fyrst kvenna sæti á Alþingi og ruddi með því brautina fyrir þær 141 konur sem setið hafa á Alþingi síðan þá. Þegar mest var sat 31 kona á þingi árið 2015.
Alllöng bið var svo eftir fyrsta kvenráðherranum en það var ekki fyrr en árið 1970, 47 árum seinna, sem Auður Auðuns var skipuð dóms- og kirkjumálaráðherra, þá fyrst íslenskra kvenna. Síðan þá hafa 39 konur gegnt ráðherraembætti.
Aðeins þrjár konur hafa gegnt embætti forsætisráðherra en fyrst þeirra var Jóhanna Sigurðardóttir árið 2009. Á eftir henni komu Katrín Jakobsdóttir sem skipaði embættið á árunum 2017 til 2024 og við keflinu tók núverandi forsætisráðherra, Kristrún Frostadóttir.
