Leó páfi XIV hefur greitt atkvæði utan kjörfundar í þingkosningum á miðju kjörtímabili Bandaríkjaforseta. Kjördagur er næsta þriðjudag. Páfinn er fyrsti Bandaríkjamaðurinn til að gegna páfadómi.
Leó XIV er því fyrsti páfinn til að greiða atkvæði í kosningum í Bandaríkjunum. Páfagarður tilkynnti í dag að Leó, fyrsti bandaríski páfi sögunnar, hefði kosið utan kjörfundar í Chicago með póstatkvæði. Leiðtogi 1,4 milljarða kaþólikka um víða veröld átti fyrr á árinu í útistöðum við Donald Trump vegna gagnrýni á stríðsreksturinn í Íran og innflytjendamál.
Trump sagði Leó vera veikgeðja og hræðilega vankunnandi um utanríkismál. Páfinn trúir á rétt og skyldu ríkisborgara til að taka þátt í lýðræðislegum kosningum, segir í yfirlýsingunni og því hafi hann sent inn atkvæði sitt.
Einnig er staðfest að Robert Francis Prevost, sem er borgaralegt nafn páfa, nýtti bandarískan kosningarétt sinn þá tvo áratugi sem hann sinnti trúboði og hjálparstörfum í Perú. Hann er einnig perúskur ríkisborgari.
