Sjúklingar með blóðkrabbamein sem þurfa á ónæmismeðferð að halda geta nú fengið hana á Landspítalanum því spítalinn hefur nú fengið vottun til að veita meðferðina.
Spítalinn hefur áður verið í samstarfi við sjúkrahúsið í Lundi í Svíþjóð og þangað hafa allir sjúklingar verið sendir. Þeir þurfa að fara tvisvar. Í fyrra skiptið eru hvít blóðkorn tekin úr sjúklingnum. Þær eru sendar til lyfjafyrirtækis sem breytir þeim svo þær þekki krabbameinið. Svo er þeim fjölgað. Þá þarf sjúklingurinn að fara aftur til Lundar þar sem frumunum er dælt í líkamann. Meðferðin tekur fjórar vikur.
Hallgerður Lind Kristjánsdóttir blóðlæknir á Landspítalanum og formaður CAR-T hóps spítalans. Hún hélt fyrirlestur um meðferðina á lyflæknaþingi í gær en það stendur nú yfir í Hörpu.
Landspítalinn hefur nú eftir tveggja til þriggja ára ferli fengið vottun til að gefa tvö lyf sem virka á ákveðin eitilfrumukrabbamein og á bráðaeitilfrumuhvítblæði. Síðan er vonast til að leyfi fáist til þess að gefa fleiri lyf svo hægt sé að fækka þeim sjúklingum sem senda þarf utan.
Síðustu ár hafa sextán sjúklingar fengið þessa meðferð í Lundi, segir Hallgerður Lind: „Það er allt tilbúið [á Landspítalanum] þegar að kemur sjúklingur sem þarf á þessari meðferð að halda.“
Auk þess að spara óþægindi fyrir sjúklinga er væntanlega líka verið að spara fé sem Sjúkratryggingar verða að borga fyrir að senda fólk utan?
„Já, það er svo sannarlega. Þetta er ódýrara fyrir okkur að gera þetta hérna heima í staðinn fyrir að senda sjúklingana erlendis. Og svo er líka alltaf ættingi sem fer með og það er auðvitað líka mikið álag á þá. Þannig að þetta er sparnaður á allan máta.“
