Frumvarp atvinnuvegaráðherra til nýrra heildarlaga um lagareldi var ekki samþykkt á Alþingi á síðasta þingvetri. Frumvarpið er ekki á þingmálaskrá ríkisstjórnarinnar fyrir komandi vetur.
Óvíst er um framtíð frumvarpsins en ráðherra segir það slæmt - bæði fyrir atvinnustarfsemina og náttúruvernd.
„Við fórum með þetta af stað af miklum krafti síðastlðinn vetur. Það var mjög vel unnið innan ráðuneytisins og í góðu samtali við atvinnugreinina. Síðan kemur í ljós á lokametrunum að það var ekki samstaða innan greinarinnar um að styðja að málið færi í gegn og það dagar uppi, sem er mjög bagalegt,“ segir Hanna Katrín.
Erfitt er að búa til heildstæðan lagaramma utan um atvinnuveg sem þegar er farinn af stað, að sögn ráðherra.
Frumvarpið hefur tekið mikla orku - bæði í ráðuneytinu og í þinginu.
„Ég er bara í þeirri stöðu að þurfa að forgangsraða. Það eru mörg stór og mikilvæg mál á þingmálaskrá núna. Þess vegna er þetta mál ekki þar. Mér þykir það mjög miður. Mögulega næst eitthvað samtal við greinina sem gefur mér fyrirheit að þetta nái að klárast, næði að klárast færi það á dagsskrá en eins og staðan er núna er málið ekki á dagskrá,“ segir Hanna Katrín.
