Á Brúnastöðum í Flóa búa þau Ágúst Ingi Ketilsson og Elín Magnúsdóttir ásamt börnum sínum með glæsilegt kúabú, auk þess að vera með um 150 fjár. Róbót er í fjósinu þar sem eru að jafnaði um 60 kýr.
Ein kýr í fjósinu vekur sérstaka athygli en það er hún Ástrós, sem mjólkar svo mikið að annað eins hefur ekki sést á bænum og hún var afurðahæsta kýrin í Nautgriparæktarfélagi Hraungerðishrepps og Ölfuss á síðasta ári. Nútímabóndinn getur nú fylgst með öllu í tölvunni.
„Hún náði að fara hér í 54 lítra um daginn og er núna í um 50 lítrum. Hérna sést mjaltaskeiðsframleiðslan á fyrsta kálfi, sem var 14.266 kíló,” segir Ágúst Ingi.
Já, Ástrós er sannkölluð ofurkýr enda bændurnir stoltir af henni.
„Þetta er náttúrulega gríðarlegur afurðagripur, mjög dugleg, mjög dugleg að éta en hún er ekkert fyrir neitt kelerí eða svoleiðis en hún er alltaf að og mjólkar náttúrulega fádæma mikið,” segir Ágúst Ingi.
„Auðvitað er maður ánægður með svona grip. Það væri auðvelt að vera bóndi ef allir gripirnir væru svona,” segir Elín.
Hvernig myndir þú lýsa Ástrósu?
„Hún er bara ofsalega fín kýr, dugleg að mæta í mjaltir, já bara fínasta kú”.
Ástrós hefur borið tveimur kálfum, nú síðast í mars en þá kom naut undan henni, sem fékk nafnið Bubbi. En af hverju heitir hún Ástrós?
„Mamma hennar heitir Syneta, þannig að þá lá beint við að hún héti Ástrós,” segir Elín. Lesendum til glöggvunar eru bæði Ástrós og Syneta titlar á lögum eftir Bubba Morthens.
Þannig að þetta er svona Bubbaþema hjá ykkur eða hvað?
„Já, það er gaman að hafa eitthvert þema”, segir Ágúst Ingi.
Þannig að þið elskið Bubba Morthens?
„Gera það ekki allir, já, já, við höldum upp á tónlistina hans,” bætir Ágúst Ingi stoltur og ánægður með Bubba Morthens.
